Хиймэл оюунт машин хүмүүсийн ажлын байрыг булаах цаг тийм ч ойрхон биш байгааг шинэ судалгааны үр дүн харуулжээ.
Тухайлбал энэ үйл явц төсөөлж байснаас удаан, алгуур явагдах ба одоохондоо ихэнх ажлын байранд хүн ажиллах нь эдийн засгийн хувьд ашигтай хэвээр байгааг Массачусетсын Технологийн Хүрээлэнгийн Компьютерын Шинжлэх Ухаан, Хиймэл Оюуны Лабораторийн судлаачид дүгнэсэн байна.
Жишээлбэл нийт ажлын байрны 23 хувьд яг одоо хүмүүсийг машинаар орлуулах нь эдийн засгийн хувьд үр ашигтай байгаа ажээ.
Мэдээж энэ үйл явц цааш гүнзгийрэх ч нэлээд хугацаа шаардагдах гэнэ.
“Ихэнх тохиолдолд яг одоогоор хүмүүс ажил гүйцэтгэх хамгийн хямд, эдийн засгийн хувьд хамгийн ашигтай хувилбар хэвээр байна. Бидний дүгнэснээр хиймэл оюунд төрөл бүрийн ажил үүрэг гүйцэтгэх маш их боломж байгаа ч тэдгээрийг шууд ашиглаж эхлэх боломж алга. Үүнд нөлөөлж буй гол хүчин зүйл нь эдийн засгийн үр ашиг” гэж судалгааг ахалсан Массачусетсын Технологийн Хүрээлэнгийн ирээдүйн технологи судлалын төслийн захирал Нэйл Томпсон ярьжээ.
Түүний баг хиймэл оюунаар гүйцэтгүүлэх хамгийн боломжтой гэгддэг ажлын байруудын өнөөдөр хүмүүст өгч буй цалин хөлсийг машинаар орлуулахад шаардлагатай хөрөнгө оруулалттай харьцуулсан байна.
Ингэхэд одоогоор хүмүүсийг ажиллуулах нь хамаагүй зардал багатай байжээ.
“Хиймэл оюунт машинууд хаа сайгүй ажиллаж эхлэх цаг болоогүй. Үүний гол шалтгаан нь эдийн засгийн үр ашиг” гэж Томпсон хэлж байна.
Тиймээс бодлого тодорхойлогчид хиймэл оюуны хувьсгалд дасан зохицох төлөвлөгөө боловсруулахдаа цаг хугацааны хувьд зөв тооцоолох шаардлагатай гэж тэдний баг дүгнэжээ.
Дөнгөж өнгөрсөн долоо хоногт Олон Улсын Валютын Сан дэлхий даяар бүх ажлын байрны бараг 40 хувийг машинаар орлуулах боломж ойрхон байгаа ба энэ чиг хандлага хүмүүсийн орлогын тэгш бус байдлыг улам гүнзгийрүүлэх аюултайг анхааруулсан юм.
ОУВС-ийн захирал Кристалина Георгиева хиймэл оюуны ажлын байрны түрэмгийллээс хүмүүсийг хамгаалах нийгмийн хамгааллын систем бий болгоход анхаарал тавихыг улс орнуудын удирдагчдад уриалсан байна.
“Энэ судалгаа бидэнд ажлын байрны шилжилт хэр хурдан явагдахыг бодитой тооцоолох боломж олгож байна. Ингэснээр илүү тодорхой төлөвлөгөө боловсруулах боломжтой болох юм” гэж Томпсон ярьжээ.
Эх сурвалж: CNN
