“Нэг жуулчинд-Нэг хонь”, “Нэг жуулчинд-Нэг ямаа” хөтөлбөр Булган, Архангай аймагт хэрэгжихээр болж, үйл ажиллагаа эхлээд байна. Тодруулбал, “Нэг жуулчинд-Нэг хонь” хөтөлбөр Булган аймгаас эхлээд байна.
Бид энэ удаад хөтөлбөр хэрхэн хэрэгжих талаарх мэдээллийг хүргэж байна.
- Хонь захиалах аппликэйшн нээсэн. Дөрөвдүгээр сарын 31 хүртэл үүгээр дамжуулж хонио үрчлүүлнэ. Хонь үрчилж авсан жуулчид зун тухайн малчин айлдаа очно. Ингэхдээ хоньтойгоо “танилцахын” зэрэгцээ илүү гэрт нь хоёр хононо. Тэдэнд адуунд явах, сүү сааль, ааруул ээзгий хийлцэх, хүүхэд нь ишиг хургатай тоглох боломжийг малчин айл бүрдүүлж өгнө.
- Тухайн хоёр хоногийн хоол, үйлчилгээндээ жуулчин 2 сая төгрөгийг малчин айлд төлнө. Малчдын тухайд өдөр тутмын амьдрал дээрх үйл ажиллагаа танилцуулж, өөрсдийн иддэг хоол хүнсээрээ л үйлчлэх тул ямар нэг хүндрэл огт байхгүй.
- Хонио өгөхдөө гэрээ хийнэ. Тус гэрээнд хэрэв үрэгдвэл өөр хониор сольж өгнө гэж тусгасан. Хонь хургалбал таны хонь хургаллаа гээд илгээмжээр бойтог явуулна. Ингээд жуулчид хонь маань хургалж гээд дараа жил нь дахиад ирдэг.
- Хонь авсан жуулчинд “Малчин” гэсэн сертификат олгоно. Жуулчин апплэйкэйшнээ нээж малчны илгээсэн зураг, бичлэг зэргээс хонио харж, бусдадаа танилцуулна.
Уг хөтөлбөрийг эхлэх ажлыг Хөвсгөл аймгийн Их-Уул сумын малчин санаачилсан бөгөөд уг төслөөс өмнө малчид жуулчдад нэг хонь эсвэл адуу бэлэглэдэг. Хургалж, унагалахаар нь мэдээлэл өгч, тэд эргээд зундаа ирдэг болж. Бүр хүүхдээ Солонгост сургахаар тэр айл руугаа явуулсан малчин айл ч бий гэнэ. Судалгаагаар 300-400 малтай айлын жилийн орлого 10 сая төгрөг байна. Иймд тэд малаа олноор нядалж, эсвэл малчин амьдралыг орхиж байгаа юм. Харин уг хөтөлбөрийн хүрээнд малчин айл зундаа 20 жуулчин 2 хонуулахад л 50 гаруй сая төгрөгтэй болох боломжтой боллоо.
