Хойд Солонгос улс нэгдүгээр сарын 5-ны Баасан гаригийн өглөө баруун эргийн ус руу 200 орчим удаа их буугаар харвасан тухай мэдээлсэн. Тодруулбал, Өмнөдийн баруун хилийн Ёнпён арлын хойд хэсэгт орших Дэунсан хошуунаас өглөөний 09:00-11:00 цагийн хооронд их буугаар бууджээ.
Үүсээд буй нөхцөл байдалтай холбоотойгоор Өмнөд Солонгосын хоёр арлын оршин суугчдыг нүүлгэн шилжүүлэх тушаал өгсөн.
Мөн Өмнөд Солонгосын арми хариуд нь шууд галын сургуулилалт хийжээ. Ингэхдээ Умардын талаас хоёр дахин олон буюу 400 орчим удаа тэнгисийн хамгаалалтын бүс рүү галласан байна. Энэ нь 2018 онд цэргийн хурцадмал байдлыг бууруулах хэлэлцээрт гарын үсэг зурснаас хойш Өмнөдийн тал анх удаа Хойд Солонгосын хязгаарлалттай бүсийн ус руу буудсан явдал болжээ.
Тэгвэл Хойд Солонгос улс хоёр дахь өдрөө буюу Бямба гаригт мөн 60 орчим удаа их буугаар буудлаа. Бямба гаригийн 16:00 цагийн орчимд Хойд Солонгосын баруун өмнөд эрэг орчимоос буудсан гэж Өмнөд Солонгосын Штабын дарга нарын нэгдсэн хороо мэдээлэв. Буудлага нэг цаг орчим үргэлжилжээ.
Гэхдээ эхний өдрөөс ялгаатай нь Бямба гаригийн буудалтууд бүгд Хойд Солонгосын өөрийн нутаг дэвсгэр дотроо байсныг Өмнөд Солонгос мэдэгдлээ. Мөн заналхийлэл үргэлжилсээр байвал Өмнөд Солонгос тодорхой мэдэгдэлгүйгээр хариу арга хэмжээ авна гэв.
Эх сурвалж: YONHAP
