Долоон автомашин мөргөж, 12 настай 2 хүүхэд дайрч гэмтээсэн иргэн Ч.Маралмаад холбогдох хэргийн шүүх хурал өмнө нь хоёр удаа хойшилж, түүнд шүүхээс оногдуулсан ял шийтгэл, торгуулийн хэлбэр нь “Монголын хууль мөнгөтэй хүнд үйлчилж чаддаггүй юм байна” гэсэн хатуухан шүүмжлэлийг дагуулаад байгаа билээ.
Тэгвэл Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд /2023.03.06/ иргэн Ч.Маралмаад холбогдох хэргийн гэм буруугийн шүүх хуралдаан болсон байна.
Баянзүрх дүүргийн эрүүгийн хэргийн анхан шатны шүүхээс Ч.Маралмаагийн тээврийн хэрэгсэл жолоодох эрхийг гурван жилээр хасаж, хоёр жил зорчих эрхийг хязгаарлах ял оногдуулжээ.
Харин шүүгдэгч Ч.Маралмаа нь шүүхээс гаргасан энэхүү шийдвэрийг үл зөвшөөрч Нийслэлийн Эрүүгийн хэргийн давж заалдах шатны шүүхэд гомдол гаргажээ. Түүний гомдлыг хэлэлцэх шүүх хурал тус шүүхэд маргааш буюу 2023.05.09-нд болох юм байна.
Хэргийг сануулахад, Ч.Маралмаа нь 2022 оны аравдугаар сарын 10-ны өдөр Баянзүрх дүүргийн 26 дугаар хороо, “Олимп” хотхоны хойд замд “Toyota Landcruiser 200” маркийн тээврийн хэрэгслийг жолоодон замын хөдөлгөөнд оролцохдоо Монгол Улсын Замын хөдөлгөөний дүрмийн 3.7, 12.3, 11.5-т заасан заалтуудыг тус тус зөрчсөний улмаас эсрэг урсгал сөрөн 7 автомашин мөргөж, явган хүний замаар явж байсан 12 настай С, Э нарыг дайрч, эрүүл мэндэд нь хохирол учруулсан гэмт хэргийг үйлдсэн юм.
Энэ хэргийн тухай “Ligal Service Center”-ийн хуульч, өмгөөлөгч М.Өлзийцэцэг хэлэхдээ ” Ч.Маралмаагийн гэмт хэрэг нь болгоомжгүй хэлбэрээр үйлдэгдсэн тул хөнгөн ял шийтгэлтэй” хэмээн ярилцлагандаа дурьдсан байдаг.
Энэ тухай тайлбарлахдаа тэрээр “Хэрэгт холбогдсон хүн гэм буруугаа хүлээн зөвшөөрсөн тохиолдолд гэмт хэрэг үйлдсэн нөхцөл байдал, учруулсан хохирол, хор уршгийн шинж чанар, хувийн байдал, хохирлоо нөхөн төлсөн байдал эмнэлгийн тусламж үзүүлсэн байдал… гэх мэт зүйлсийг харгалзан шүүх эрүүгийн хариуцлагыг хөнгөрүүлж, эсхүл ялаас чөлөөлж ч болно. Автотээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэрэг нь гэм буруугийн холимог (санаатай, болгоомжгүй) хэлбэрээр үйлдэгддэг.
Өөрөөр хэлбэл, согтуугаар тээврийн хэрэгсэл жолоодож осол гаргахаас бусад тохиолдолд энэ зүйлд заасан гэмт хэрэг нь гэм буруугийн болгоомжгүй хэлбэрээр үйлдэгддэг. Ч.Маралмаагийн үйлдсэн гэмт хэрэг нь гэм буруугийн болгоомжгүй хэлбэрээр үйлдэгддэг гэмт хэрэг тул бусад төрлийн гэмт хэргээс хөнгөн ял шийтгэлтэй” гэжээ.
Харин олон нийтийн дунд анхан шатны шүүхээс иргэн Ч.Маралмаад оногдуулсан ял шийтгэлтэй санал нийлэхгүй бухимдах иргэд олон байгаа юм.
Иргэдийн олонх нь “Монголын хууль мөнгөтэй хүнд үйлчилж чаддаггүй юм байна. Анхан шатны шүүхээс Ч.Маралмаагийн “толгойг нь илсэн” шийдвэр гаргалаа” хэмээн бухимдсаар байна.
Цахим орчинд бухимдсан иргэдийн сэтгэгдлүүдийг харвал:
-“Хариуцлага хүлээлгэх хэрэгтэй хүүхдийг насаар нь тахир дутуу болголоо, харамсалтай байна”
-“Жолооны ард суухыг хүмүүс тоглоомон машин унахтай адил боддог болжээ. Уг нь энэ чинь асар том хариуцлага үүрч жолооны ард суудаг биз дээ. Одооны залуучууд хүний эрх ярихаас үүргээ ярихгүй юм”
-“Зовсон л хүүхэн байна даа, хөөрхий. Согтуу дарамттай нөхөртэй ямар олиг байхав. Өөрөө л үйлийг нь үүрч гарах гээд ядаж яваа байх. Хууль үнэн мөнийг нь олох хэрэгтэй” хэмээн цахим орчинд бухимдлаа илэрхийлсээр байна.
