Шүүхийн ерөнхий зөвлөлөөс Монгол Улсын шүүхийн 2023 оны эхний хагас жилийн шүүн таслах ажиллагааны нэгдсэн дүн мэдээг танилцууллаа.
Баянзүрх дүүргийн 26-р хорооны нутаг дэвсгэрт Ланд круизер-200 машинтай урсгал сөрж 12 настай хүүхэд, долоон машин угсруулан мөргөсөн Ч.Маралмаад шүүхээс ял шийтгэл оногдуулсан ч шүүхийн шийдвэрийг зөрчин гадуур явж байна гэсэн мэдээлэл цахим орчинд тархжээ.
Үүнтэй холбоотойгоор Баянзүрх, Чингэлтэй, Сүхбаатар дүүргийн эрүүгийн хэргийн анхан шатны шүүхийн тамгын газрын мэргэжилтэн Б.Оч:
-Баянзүрх дүүргийн эрүүгийн хэргийн анхны шатны шүүхээс Ч.Маралмаад тээврийн хэрэгсэл жолоодох эрхийг 3 жилээр хасах, зорчих эрхийг 2 жилээр хязгаарлах ял шийтгэл оногдуулсан. Шүүгдэгч Ч.Маралмаа болон түүний өмгөөлөгч Нийслэлийн эрүүгийн хэргийн давж заалдах шатны шүүх болон Улсын дээд шүүхэд гомдол гаргаснаар анхан шатны шүүхийн шийдвэрийн тогтоолыг түдгэлзүүлсэн.
Улсын дээд шүүхээс 2023 оны долоодугаар сарын 5-ны өдөр хяналтын гомдлыг хэлэлцэхээс татгалзсанаар анхан шатны шүүхийн шийдвэр хүчин төгөлдөр болсон.
2023 оны долоодугаар сарын 24-нд Нийслэлийн шүүхийн шийдвэр гүйцэтгэх газраас шүүхийн тогтоолыг Ч.Маралмаад хүлээлгэн өгсөн. Ингэснээр Шүүхийн шийдвэр гүйцэтгэх газар болон Прокурорын газар хяналт тавиад явах юм. Ч.Маралмаа давж заалдах шатны шүүхэд гомдол гаргасан тул анхан шатны шүүхийн шийдвэрийн биелэлт түдгэлзээд байсан тул гадуур чөлөөтэй явж байсан гэсэн үг хэмээн тайлбарлав.
