Геологийн салбарын ээлжит Улсын зөвлөгөөн саяхан хуралдаж, уул уурхайн салбарт тулгамдаж байгаа асуудлуудыг хэлэлцсэн. Хуралд үе үеийн геологичид, салбарын мэргэжилтнүүд, иргэд, иргэний нийгмийн байгууллагын төлөөллүүд оролцож, салбарын хөгжлийн төлөө бодол саналаа нэгтгэн, асуудал шийдлээ хэлэлцсэн юм.
Сүүлийн жилүүдэд улс орныг урт хугацаанд эрдэс баялгийн найдвартай нөөцөөр хангах ажлын эрч саарах хандлагатай болж ирсэн нь ашигт малтмалын эрлийн ажилд анхаарлаа хандуулаагүй, хайгуулын ажлыг хангалттай түвшинд хийх бололцоо олгоогүйтэй холбоотой гэдгийг салбарынхэн хэлэлцээд байна. Мөн 2022 оны сүүлээс хайгуулын тусгай зөвшөөрөл олголтыг эхлүүлсэн бөгөөд цаашид ашигт малтмалын эрэл, судалгааны ажлыг олон улсын дэвшилтэт технологи, арга зүйгээр өргөн хүрээнд, чанартай явуулахад Уул уурхай, хүнд үйлдвэрийн яам анхааран ажиллаж байгаагаа дуулгасан юм.
Уг зөвлөгөөнөөр хэлэлцсэн гол асуудлын нэг нь Эрдэс баялгийн тухай хуулиудад хуулийн давхардал, хийдэл нэмэгдэж зөрчил үүсгэдгийг салбарынхан онцолж байлаа. Тухайлбал, 2006 онд батлагдсан Ашигт малтмалын тухай хуульд 351 нэмэлт өөрчлөлт оруулаад байгаа нь анх батлагдсан хуулийн үзэл баримтлалтайгаа тохирохгүй болсныг Геологийн холбоодын нэгдсэн зөвлөлийнхөн мэдээлж байсан юм. Нөгөөтэйгүүр, уул уурхайн салбарт хөрөнгө оруулагчдын 16 орчим хувийг гадаадын хөрөнгө оруулалт эзэлдэг. Үүнээс гадна хувийн хөрөнгөөр геологийн хайгуулын ажилд зарцуулсан зардал 2018 оноос хойш буурсан үзүүлэлттэй байгаа юм.
Хайгуулын тусгай зөвшөөрлийг 2006 оны ашигт малтмал газрын тухай хуулиар сонгон шалгаруулалт болон өргөдлөөр хэн түрүүлж ирсэнд нь олгодог байсан бол 2018 онд хуульд зөвхөн сонгон шалгаруулалтаар тусгай зөвшөөрөл олгодог болжээ. 2022 онд хайгуулын 50 тусгай зөвшөөрөл олгож улсын төсөвт 14.5 тэрбум төгрөг төвлөрүүлсэн байна. 1997 оноос хойш 14 мянга гаруй хайгуулын тусгай зөвшөөрөл олгогдож, үр дүнд дэлхийн хэмжээний ганц ордыг илрүүлсэн нь Оюутолгойн орд юм байна. Тиймээс хайгуулын тусгай зөвшөөрөл олгох асуудлыг хувийн хэвшлийнхэнд тэгш хүртээмжтэй байдлаар хуулиар зохицуулж өгөөсэй гэсэн хүлээлттэй байгааг хувийн компаниудын төлөөлөл хэлж байна.
