Сонирхогчдын хөлбөмбөгийн “Bud Cup 2024” тэмцээн болох талаар зохион байгуулагчид өнөөдөр Баянзүрх дүүргийн 15 дугаар хорооны хөлбөмбөгийн талбайд мэдээлэл өглөө.
Тус тэмцээний ач холбогдол болон зохион байгуулалтын талаар спортын сэтгүүлч Э.Амарсайхан “Монгол улсад үйл ажиллагаа эрхэлж буй ААН, бизнес эрхлэгчдийн дунд сонирхогчдын “Bud Cup 2024” хөлбөмбөгийн тэмцээнийг зохион байгуулах гэж байна.
Мэргэжлийн лигийн тоглогчид оролцохгүй бөгөөд хөлбөмбөг сонирхдог бүх хүнд нээлттэй. Тэмцээний тоглолтууд Баянзүрх дүүргийн 15 дугаар хорооны хөлбөмбөгийн стандартын талбайд амралтын өдөр бүр болно.
Нэг сарын хугацаанд зохион байгуулагдах бөгөөд долоо хоног бүр 10 баг хоорондоо өрсөлдөнө. Дараагийн долоо хоногт дахин шинэ 10 баг тоглохоор тооцоолсон байгаа.
Долоо хоног бүрийн аварга багууд дөрөвдүгээр сарын төгсгөлд хоорондоо тоглох юм. Үүнд түрүүлсэн нэг баг ирэх есдүгээр сард 1990 оны Дэлхийн Аварга Шалгаруулах Тэмцээн (ДАШТ)-ий алтан шаахайн эзэн Сальваторэ Скилаччигийн багтай тоглоно.
Сальваторэ Скилаччи есдүгээр сард Монголд ирэхдээ 8-13 насны гурван хүүхдийг сонгож Ром руу хөлбөмбөгийн академийн шалгаруулалтад оролцуулахаар болсон. Хэрэв шалгарвал Европын клубүүдийн академид суралцах боломж бүрдэнэ.
Ерөнхий зохион байгуулагч “Спортын түншлэл гэрэлт ирээдүй” ХХК, алтан түншээр BUD брэнд ажиллаж байна” хэмээн ярив.
