Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хүрээнд өнөөдөр “МонЛабел” ХХК-д ажиллалаа. Тус компани 2004 онд байгуулагдсан бөгөөд бүх төрлийн хүнс, ус, ундаа, ахуйн болон гоо сайхан, бусад бүтээгдэхүүний хаяг, шошго, баглаа, боодол үйлдвэрлэдэг, үндэсний том хөрөнгө оруулагч компаниудын нэг юм.
Тус байгууллагын хамт олон 2011 онд Лондон хотноо “Олон улсын чанарын алтан титэм”-ийг салбартаа анх удаа авч, 2019 онд ISO 9001:2015 олон улсын чанарын тогтолцоог нэвтрүүлсэн байна.
Энэ үеэр “МонЛабел” ХХК-ийн захирал Н.Батмөнх “Хүнсний хангамж, аюулгүй байдал” үндэсний хөдөлгөөний хүрээнд урт хугацаатай, хүү багатай зээлд хамрагдаж, анхан шатны түүхий эд боловсруулах үйлдвэр байгуулахаар төлөвлөснөө танилцууллаа.
Уг арга хэмжээний дараа Монгол Улсын Ерөнхийлөгч У.Хүрэлсүх “Ханбогд Кашимер” ХХК-д ажиллав. Тус компанийн гүйцэтгэх захирал Ч.Ганцэцэг ангилан ялгах, угаах дамжлага, самнах, сүлжих болон зөөлөн оёдлын үйлдвэрийн үйл ажиллагаагаа товч танилцууллаа.
Тус компани одоогоор 500 гаруй ажилтантай бөгөөд 80 гаруй хувь нь эмэгтэйчүүд юм байна. Жилд 1,500 гаруй тонн ноолуур боловсруулж, 200,000 ширхэг сүлжмэл, 150,000 ширхэг нэхмэл бүтээгдэхүүн үйлдвэрлэдэг.
Өнгөрсөн 24 жилийн хугацаанд ноолуурын экспортоор тэргүүлэгч аж ахуйн нэгжийн нэг болж, валютын нөөцийг нэмэгдүүлэхэд жинтэй хувь нэмэр оруулж иржээ. Түүнчлэн харилцагч малчдад малын хивэг, тэжээл нийлүүлж, малыг нь вакцинжуулалтад хамруулахаас гадна хүүгүй зээл өгч хамтран ажилладаг.
Ноолуураа самнаж эцсийн бүтээгдэхүүн үйлдвэрлэснээр 4,000 ажлын байр бий болж, 600 сая ам.долларын орлого олох боломж байгаа тухай гүйцэтгэх захирал Ч.Ганцэцэг хэлэв. Тус компани ойрын хугацаанд Итали Улсын хөрөнгө оруулалтаар хамтарсан хоёр үйлдвэр ашиглалтад оруулахаар төлөвлөөд байгаа аж.
