Хойд Солонгос улс өнгөрсөн Баасан гаригт 200 гаруй удаа баруун эргийн ус руу, Бямба гаригт 60 гаруй удаа өөрийн нутаг дэвсгэр дотроо их буугаар галласан. Баасан гаригт Өмнөд Солонгосын арми хариуд нь шууд галын сургуулилалт хийжээ. Ингэхдээ Умардын талаас хоёр дахин олон буюу 400 орчим удаа тэнгисийн хамгаалалтын бүс рүү галласан байна. Энэ нь 2018 онд цэргийн хурцадмал байдлыг бууруулах хэлэлцээрт гарын үсэг зурснаас хойш Өмнөдийн тал анх удаа Хойд Солонгосын хязгаарлалттай бүсийн ус руу буудсан явдал болжээ.
Тэгвэл Хойд Солонгос Ням гаригт баруун тэнгисийн хилийн ойролцоо дахин 90 гаруй удаа их буугаар буудав.
Удирдагч Ким Жон Уны дүү Ким Ё Жон энэ талаар мэдэгдэл хийхдээ “Өмнөд Солонгосын армийн илрүүлэх чадварыг шалгах зорилгоор Бямба гаригт их буутай төстэй дуугардаг тэсэлгээний нунтаг дэлбэлсэн” гэжээ. “Үр дүн нь бидний хүлээж байсанчлан тодорхой байлаа. Тэд тэсэлгээний чимээг буун дуу гэж буруу үнэлж, өдөөн хатгалга гэж ойлгож байна. Далайн хилийн хойд хэсэгт сум унасан гэж худал, увайгүй мэдэгдэл хүртэл хийлээ. Өмнөд солонгосчууд ийм хүмүүст аюулгүй байдлаа даатгаж, тэдэнд асар их татвар төлж байгаа нь үнэхээр өрөвдөлтэй юм. Оронд сонсох, үнэрлэх мэдрэмж өндөртэй нохойд аюулгүй байдлаа даатгасан нь дээр” гэж ёжилсон утгатай мэдэгдэл хийсэн байна.
Мөн Өмнөд Солонгосын цэргүүдийг дүрэмт хувцастай алиалагчид гэж нэрлэжээ.
Тэгвэл Хойд Солонгосын армиас эрэг орчмын их бууны системийг ашиглан цэргийн сургуулилалт хийсэн гэх тайлбарыг өгчээ. Мөн сум харвах чиглэл нь Өмнөд Солонгост ямар нэгэн аюул заналхийлэл учруулахгүй гэжээ.
