Люк Литтлерийн үнсгэлжингийн үлгэр үргэлжилсээр дартсын дэлхийн аваргын финалд хүрлээ. Дөнгөж 16 настай англи хүү хагас шигшээд 2018 оны дэлхийн аварга Роб Кроссыг дийлжээ. Анхны дэлхийн аваргадаа оролцож буй Литтлер финалд энэ жилийн гол фаворит Люк Хампристэй цэц мэргэнээ сорино. Хамприс хагас шигшээд Скотт Уиллиамсыг 6-0 гэсэн харьцаатай илт давуу ялсан юм.
Финалд шалгараад буй Хамприс дэлхийн чансааг тэргүүлээд эхэлжээ.
Дартсын ДАШТ-ий финалд хүрсэн хамгийн залуу тамирчин болоод буй Люк Литтлер хэдийнэ 200 мянган фунтын эзэн болоод буй. Тэрбээр финалд хүрсэн талаараа “Дебют дэлхийн аваргадаа финалд хүрсэн гэж бодохоор л галзуурмаар байна. Дэлхийн аваргын ганц тоглолтод л хожиход л үнэхээр баярласан. Одоо харин энд хүрээд байна. Амаргүй байна. Дэлхийн аваргын дебютдээ түрүүлж байсан Робтой тоглолоо. Хэлэх үг алга” гэжээ.
Харин түүнээс ирэх финалын талаар асуухад “Би хийж байсан зүйлээ л хийнэ. Өглөө нь хиам, бяслагтай омлетоо идэж, зааландаа ирнэ. Энд ирээд пицца идэж, бэлтгэлээ хийнэ. Би үүнийг л өдөр бүр хийсэн” гэж хариулав.
Люк Литтлерийн финалд хүрсэн зам
- Эхний шатанд: Люк Литтлер 3 – 0 Кристан Кист
- Хоёрдугаар шат: Люк Литтлер 3 – 1 Андрью Гилдин
- Гуравдугаар шат: Люк Литтлер 4 – 1 Мэтт Кэмпбэл
- Дөрөвдүгээр шат: Люк Литтлер 4 – 1 Рэймонд ван Барневелд /Дэлхийн таван удаагийн аварга/
- Шөвгийн найм: Люк Литтлер 5 – 1 Брэндан Долан
- Хагас шигшээ: Люк Литтлер 6 – 2 Роб Кросс /2018 оны дэлхийн аварга/
Тэгвэл Хамприс 18 тоглолт дараалан ялсан үзүүлэлттэй дэлхийн чансааг тэргүүлж байна. Өдгөө 28 настай тэрбээр финалд хүрсэн талаараа “Гайхалтай байна. Өөрийгөө хэзээ ч дэлхийн чансааг тэргүүлнэ гэж бодож байсангүй. Онцгой мэдрэмж төрж байна. Өмнө нь ч хэлж байсанчлан дэлхийн чансааг хэдхэн сар тэргүүлнэ. Харин дэлхийн аварга гэх цол үүрд үлдэнэ шүү дээ” гэв.
Харин өрсөлдөгч Литтлерийн талаар “Түүний тоглолтыг олон удаа үзсэн. Тайзан дээр түүний эсрэг бүр ч илүү хэцүү байх болов уу. Тэр онцгой гэдгээ баталсан шүү дээ. Би амьдралынхаа магадгүй хамгийн чухал тоглолтыг түүний эсрэг хийх байх. Миний өмнө том даалгавар үлдлээ. Бид дэлхий нийтэд хамгийн шилдэг финалын тоглолтыг үзүүлнэ гэж найдаж байна” гэжээ.
