Нийслэлийн Баянгол дүүргийн 309 дүгээр цэцэрлэгийн багш хүүхдүүдээ зодож байгаа дүрс бичлэг цахим орчинд түгээд буй. Тодруулбал тус цэцэрлэгийн хүүхдүүд эцэг эхдээ соробан сампингийн багш нь зоддог, толгой руу нь цохидог болохыг удаа дараа хэлсэн байна. Тиймээс эцэг эхчүүд гомдол гаргаж, хяналтын камерын бичлэгийг шүүснээр тус багш хүүхдүүдийн толгой руу цохих, нүүр рүү нь алгадах зэрэг ёс зүйгүй үйлдэл гаргадгийг илрүүлжээ.
Тухайн багшид ямар арга хэмжээ авахыг Нийслэлийн боловсролын ерөнхий газраас тодруулахад “Хэрэг бодитой эсэхийг Боловсролын мэргэжлийн хяналтын хэлтэс, ХГБХХЕГ, ЦЕГ-аас газар дээр нь ажиллаж шалгаж байна” гэв.
Гомдол гаргасан эцэг, эхчүүдийн төлөөлөл “309-р цэцэрлэгт соробан сампингийн сургалт хоёр дахь жилдээ хичээллэж байна. Манай хүүхэд энэ жилээс явж эхэлсэн ч сампиндаа явах дургүй болж, “Багш толгой руу балаар цохидог” гэж хэлсэн. Нэг өдөр хүүхдийн маань толгойд 2-3 хумсны мөр гарсан байхаар нь сампингийн багш, цэцэрлэгийн эрхлэгчтэй нь уулзсан. Эрхлэгч нь “Та нар хоорондоо тохироод зохицчих. Хэргийг гадагш гаргах хэрэггүй. Гурван сарын сургалтын төлбөрийг нь буцааж өгье” гэх мэтээр мэдээллийг нуун дарагдуулахыг оролдсон.
Цэцэрлэгийн камерын бичлэгийг үзье гэхэд үзүүлээгүй. Олуулаа шаардлага тавьсаар байгаад үзэхэд нэг багш хүүхдүүдийг хоёр жилийн турш зодсон байсныг илрүүллээ. Хүүхдүүд соробаны багшаасаа их айдаг. Багш нь маш их даалгавар өгсөн байхаар нь “Миний хүү зарим даалгавраа хийхгүй унтчих” гээд унтуултал шөнө дөрвөн цагт сэрээд “Даалгавраа хийхгүй бол багш зодно” гэж хэлсэн” хэмээсэн байна.
Тухайн багш Япон улсад сургууль төгссөн бөгөөд энэ оны 5 сард уг цэцэрлэгт мөн ийм хэрэг гарч байжээ.
