Үнэт цаасны тухай хуульд нэмэлт, өөрчлөлт оруулах тухай хуулийн төслийг хэлэлцэх эсэх асуудалд санал хураалт явуулж, УИХ-ын гишүүдийн олонх нь дэмжив. Ингэснээр тус хуулийн төслийг анхны хэлэлцүүлэгт бэлтгүүлэхээр Эдийн засгийн байнгын хороонд шилжүүлэв.
Хэлэлцүүлгийн үеэр Санхүүгийн Зохицуулах Хорооны дарга Д.Баярсайхан тус хуулийн зүйл заалттай холбоотой зарим мэдээллийг өглөө.
Тэрбээр “Өмч хувьчлал хийгдсэнээс хойш маш олон иргэн цэнхэр, ягаан тасалбараар аж ахуйн нэгжүүдийн хувьцааг авсан. Үнэт цаасны төвлөрсөн хадгаламжийн төв дээр тухайн иргэдийн тодорхой хэмжээний хувьцаа байдаг.
Тиймээс тус байгууллагад иргэдийн ямар хувьцаа багаа талаар лавлаад явах боломжтой. Өнөөдрийн байдлаар 173 хувьцаат компани байна.
Мөн зургаан банк хувьцаат болсон. Нэг нь системийн нөлөө бүхий бус банк. Дээрх банкууд 5-20 хүртэлх хувийг иргэд олон нийтэд санал болгосон. Олон нийтийн компани болсноор 4-5 эзэнтэй байсан банк анхдагч зах зээлд 72 мянган харилцагчтай болсон байгаа.
2011-2012 оны эдийн засаг өсөлттэй үед гадаадын иргэд дотоодын үнэт цаасны арилжаанд 70 гаруй хувьтай оролцож байсан. Харин одоо бол тав хүрэхгүй хувьтай байна. Дотоодын аж ахуй нэгжүүд бондын зах зээлд санхүүжилт татдаг болсон” хэмээн ярив.
14:48 2024/01/11
УИХ-ын намрын нэгдсэн чуулган Төрийн ордонд болж байна.
Үдээс хойших хуралдаанаар Хүүхэд хамгааллын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслийг эцэслэн батлах бэлтгэл хангуулахаар Нийгмийн бодлогын байнгын хороонд шилжүүлсэн юм.
Үргэлжлүүлэн 2023 оны арванхоёрдугаар сарын 22-ны өдөр Засгийн газраас УИХ-д өргөн барьсан Үнэт цаасны зах зээлийн тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцэж эхэллээ.
