Өнгөрсөн шөнө Испанийн Ла лигийн 19-р тойргийн тоглолтууд явагдлаа. Лигийг тэргүүлэгч “Реал Мадрид” энэ тойрогт “Мальорка”-той тоглосон юм.
Тус тоглолтод Антонио Рудигер хожлын гоолыг оруулсан бол түүнд 38 настай Лука Модрич булангийн цохилтоос гоолын дамжуулалт өгөв.
Модрич 2024 оны эхний тоглолтодоо 86 удаа бөмбөгөнд хүрч, долоон удаа түлхүүр дамжуулалт өгсөн бөгөөд мөн хоёр ч удаа өрсөлдөгч багийнхнаасаа бөмбөгийг тасалсан.
Тэрбээр тус тоглолтод хамгийн олон гоолын боломж үүсгэсэн, мөн хамгийн олонтоо бөмбөг тасалсан тоглогчоор тодров.
Ирэх зун Тони Кроос, Начо, Лука Модрич нарын “Реал Мадрид”-тай байгуулсан гэрээний хугацаа дуусна. Дасгалжуулагч Анчелотти “Тэд юу хийхээ өөрсдөө шийдэж чадна. Гэрээгээ сунгах эсэх нь зөвхөн тэднээс шалтгаалах учиртай. Гэхдээ ирээдүйн авьяастнууд олноороо хүч түрж байна. Эндрик ч удахгүй бидэнтэй нэгдэнэ” гэсэн юм.
Харин Модрич “Миний төлөвлөгөө бол “Реал Мадрид”-тай түүхэн амжилтаа үргэлжлүүлэх, хожих, цом өргөх. Энэ улиралд ч гэсэн бид амжилтад хүрнэ гэж найдаж байна. Дэлхийн хамгийн шилдэг клуб дэх мөрөөдлийн аяллаа хэр удаан үргэлжлэхийг хэн ч байсан хэзээ ч тааварлашгүй. Би зөвхөн энд өнгөрүүлэх хором бүрээсээ таашаал авахыг л хичээж байна” гэж мэдэгдсэн.
Хорватын шигшээ багийн ахлагч өдгөө 38 настай Лука Модричийг “Евро-2024” тэмцээнд шигшээ багтаа тоглоно гэж тус улсын “24sata” сайт өнгөрсөн зун баталсан билээ. Түүнийг бүх цаг үеийн шилдэг хагас хамгаалагчдын нэг, мөн Хорватын хөлбөмбөгийн түүхэн дэх хамгийн агуу хөлбөмбөгчин гэж тодотгодог.
2018, 2022 оны ДАШТ болон өнөө жилийн Европын Үндэстнүүдийн лигт гол фаворитуудыг хожиж таамаг эвдсэн ч, цом өргөж чадаагүй нь түүнийг ойрмогхон шигшээ багаасаа зодог тайлж магадгүй гэсэн хардлагыг төрүүлээд байсан юм.
Гэвч тэрээр 2018 онд дэлхийн шилдэг хөлбөмбөгчинд олгодог БаллонДор шагналыг гардсан анхны Хорват тоглогч болсон төдийгүй клубийн түвшинд боломжит бүхий л оргил амжилтад хүрээд байгаа билээ. Ялангуяа “Реал Мадрид” клубт ирснээсээ хойш 23 цом өргөсөн бөгөөд тус клуб энэ зуур Аваргуудын лиг болон клубуудын ДАШТ-д тус бүр таван удаа, Ла лигт гурван удаа түрүүлэхэд Модричийн хувь нэмэр элбэг байсан нь тодорхой.
Модричид одоо шигшээ багтайгаа цом өргөх ганцхан хүсэл бий. Түүний хувьд, дутуугаа гүйцээх сүүлийн боломж нь 2024 оны Европын АШТ байх болно.
