Эквадор улсын Гуайакил хотын TC телевизийн студийг өчигдөр хэсэг зэвсэгт этгээдүүд шууд нэвтрүүлгийн үеэр эзлэн авсан байна.
Тэд телевизийн ажилчдыг шалан дээр хэвтүүлсний дараа шууд дамжуулалт тасалджээ.
Эквадорын ерөнхийлөгч Даваа гарагт улс орон даяар 60 хоногийн онц байдал зарласны маргааш ийм халдлага болсон байна.
Ням гарагт Гуайакил хотын шоронгоос тус улсын хамгийн том гэмт хэргийн бүлгийн толгойлогч оргосонтой холбогдуулан ийм арга хэмжээ авсан юм.
Телевизийн студийг зэвсэгт этгээдүүд дайрснаас хойш 30 минутын дараа цагдаагийн тусгай хүчнийхэн чөлөөлжээ.
Энэ халдлагын дараа Эквадорын ерөнхийлөгч Даниэл Нобоа гэмт хэрэгтнүүдэд дайн зарлаж, зохион байгуулалттай гэмт хэргийн хэд хэдэн бүлгийг “террорист байгууллага” гэж нэрлэх захирамж гаргасан байна.
Орон даяар үймээн самуун дэгдэж болзошгүй болсонтой холбогдуулан өчигдөр Гуайакилийн Их сургууль сургалтын болон захиргааны бүх үйл ажиллагаагаа зогсоож буйг зарлажээ.
Ням гарагт шоронгоос оргосон этгээд нь Лос Чонерос бүлгийн толгойлогч Фито хочит Адольфо Масиас байсан юм.
Өндөржүүлсэн хамгаалалттай шоронд шилжүүлэхийн өмнөхөн тэр хоригдож байсан өрөөнөөсөө сураггүй алга болсон байна.
Фитог оргоход тусалсан байж болзошгүй шоронгийн хоёр ажилтныг Эквадорын хууль хүчнийхэн баривчилжээ.
Лос Чонерос бол Эквадорын хамгийн том гэмт хэргийн бүлэг. Тэднийг Мексикийн Синалоа картелтай холбоотой ажиллаж, хар тамхийг нь Эквадорын нутаг дээгүүр тээвэрлэдэг гэж үздэг.
Телевизийн студийг эзэлсэн явдал Фитогийн орголттой холбоотой эсэх тодорхойгүй байна. Гэхдээ энэ явдал Эквадор улсад нийгмийн аюулгүй байдал ямар хэмжээнд хүрч доройтсоныг харуулж байгаа юм.
Мягмар гарагийн өглөө бас тус улсын Риобамба хотын шоронгоос 40 орчим хоригдол оргосон байна. Тэдний дунд бас нэг хар тамхины бүлгийн толгойлогч байжээ.
Эх сурвалж: BBC
