ТБД Андуудын автобусны буудал дээрх ТҮЦ-үүдийг хоёр сарын өмнө ачиж, нүүлгэсэн ч эргэн ирж үйл ажиллагаагаа явуулж байгаа аж. Энэ талаар Баянгол дүүргийн Хүнс, худалдаа үйлчилгээний хэлтсийн дарга Г.Батсүрэнгээс тодруулахад “Нүүлгэсэн ТҮЦ-үүдийг шөнийн цагаар зөвшөөрөлгүйгээр буцааж нийтийн эзэмшлийн талбайд байршуулж байна. Харьяа хорооноос нь хяналт тавьж, Замын цагдаагийн газартай хамтран ачих ёстой.
2023 оны есдүгээр сарын 25-нд дүүргийн засаг даргын захирамжаар ТҮЦ-үүдийг нүүлгэж эхэлсэн. Одоогоор захирамжийн хугацаа дууссан байгаа тул нүүлгэн шилжүүлэлтийг түр зогсоосон. Урт цагааны асуудал шиг иргэдээс санал хурааж ТҮЦ-үүдийг хураах эсэхийг шийдээд 2024 оны гуравдугаар сарын 1-нээс дахин захирамж гаргаж ТҮЦ-үүдийг нүүлгэнэ” гэв.
Улаанбаатар хотын Захирагчийн ажлын алба /УБЗАА/-наас иргэдийн зорчих хөдөлгөөнд саад учруулж, замын хөдөлгөөний аюулгүй байдал хангахгүй болон ногоон байгууламж дээр зөвшөөрөлгүй байршуулсан түргэн үйлчилгээний цэг /ТҮЦ/-үүдийг нүүлгэх чиглэлийг дүүргүүдэд өгсөн юм.
