Малын эмч Т.Сундуйбаяр махыг хэрхэн сонгож авах талаар зөвлөжээ. Тэрбээр “Нойтон махыг л шинэ, эрүүл мах гэж итгэж, хоол хүнсэндээ шууд хэрэглэж байна. Гэтэл тухайн махны дээжийг лабораторид шинжлүүлсэн бичигтэй зайлшгүй танилцах ёстой.
Өнөөдөр Монгол улсын нийт 70 сая малд хяналт тавьж ажиллах малын эмчийн тоо хангалттай хэмжээнд биш байна. Малын биед шаардлагатай нөхцөлд антибиотикийг зөвхөн мэргэжлийн малын эмчээр тариулах ёстой бөгөөд, эмийн болон антибиотикийн үлдэгдлийг малын биеэс бүрэн гадагшилтал, доод талдаа 28 хоног сүүг нь хэрэглэхгүй, нядалж мах болгохгүй байх ёстой байдаг.
Мэргэжлийн эмчийн хяналтгүй, ариун бус зүүгээр тарилга хийснээр малын биед бүрэн шимэгдэхгүй, маханд буглаа болж үүсэх эрсдэл өндөр. Малын эмчийн хүрэлцээ, тархан суурьшсан байдал, өвөлжилтийн нөхцөл байдал, малчдын хариуцлага зэрэг шалтгаанаас болоод ихэнх тохиолдолд малчид таамгаар оношилж, хугацаа хадгалалтын нөхцөл хангаагүй тарилгыг хаа нэгтэйгээс худалдан авч, ариун бус орчинд өөрсдөө тарьж, антибиотик бүрэн гадагшилтал хүлээлгүй нядалгаанд оруулж, сүү, сүүн бүтээгдэхүүнийг нь хэрэглээнд нэвтрүүлэх эрсдэлтэй үйлдлүүд байгааг үгүйсгэхгүй.
Иймд хэрэглэгч та бүхэн мах худалдан авахдаа гарал үүсэл тодорхой, шинжилгээний бичигтэй, хариуцах эзэнтэй газраас худалдан авах хэрэгтэйг зөвлөе. Харин нэгэнт буглаа үүссэн махыг худалдан авснаа мэдсэн бол хүнсэндээ хэрэглэхээс шууд татгалзаж, худалдан авсан газраа буцаан өгөөрэй. Бугласан хэсгийг тойруулан огтолж, тасалж авч хэрэглэж болохгүй бөгөөд тухайн мах антибиотикийн агууламж өндөр байдгийг анхаарна уу.
Махаа сайн шалгахгүй бол антибиотикийн дасал болох эрсдэлтэй бөгөөд, ялангуяа хүүхэд, хөгшдөд илүү мэдрэг тусдаг гэдгийг анхаарч, эрүүл хүнс хэрэглэхийг зөвлөж байна” гэжээ.
