Хойд Солонгосын засгийн газар өмнөд хөршөөсөө бүх харилцаагаа тасалж, хоёр Солонгосыг нэгтгэх, хамтран ажиллах бүх хөтөлбөрөө зогсооно гэж мэдэгджээ. Удирдагч Ким Жон Ун Мягмар гаригт Өмнөд Солонгосыг АНУ-тай мөр зэрэгцэн цэргийн түрэмгийлэл хийж байна хэмээн буруутгаж, Сөүлтэй дипломат болон эв санааны нэгдлийн бүх санаачилгыг цуцлахыг тушаалаа.
“БНАСАУ-ын хууль тогтоомжийг хэлэлцэж байгаа Ардын их хурлын энэ удаагийн чуулганаар бид өмнөд хойдын харилцаа, нэгдэх бодлогын талаар шинэ байр сууриа илэрхийлж, энхийн замаар нэгдэх эв нэгдлийн байгууллага болгон байгуулсан бүх байгууллагыг татан буулгалаа. Энэ бол зайлшгүй явагдах ёстой зайлшгүй үйл явц гэж хэлэх ёстой” гэж тэрбээр мэдэгджээ.
Ким Жон Ун улсын хил хязгаарыг үл тоомсорлох нь дайн хийх үндэслэл болно гэж сүрдүүлэв. Тэрбээр “Манай улсын өмнөд хилийг тодорхой зурсан учраас хуульчлаагүй “хойд хязгаарын шугам” болон бусад хил хязгаарыг зөрчихийг хэзээ ч тэвчиж болохгүй. БНСУ манай нутаг дэвсгэр, агаар, усны 0.001 мм-ийг ч зөрчвөл дайны өдөөн хатгалга гэж авч үзэх болно” гэсэн байна.
Ким Жон Ун Өмнөд Солонгосыг тус улсын “зайлшгүй, гол дайсан” гэж тодорхой бичихийн тулд улсын Үндсэн хуульд өөрчлөлт оруулахыг санал болгожээ. “Үүнтэй холбогдуулан БНАСАУ-ын Үндсэн хуулийн зарим агуулгыг шинэчлэх шаардлагатай гэж би бодож байна. БНСУ-ын Үндсэн хууль гэгчид “БНСУ-ын нутаг дэвсгэр нь Солонгосын хойг болон түүний хавсаргасан арлыг хамрах болно” гэж илэн далангүй заасныг би саяын чуулганы хуралдаан дээр дурссан. Миний бодлоор Солонгосын хойгт дайн дэгдсэн тохиолдолд БНСУ-ыг бүрмөсөн эзэлж, эрхшээлдээ оруулж, эргүүлэн авч, манай улсын нутаг дэвсгэрийн нэг хэсэг болгон хавсаргах асуудлыг Үндсэн хуульдаа тусгаж болно” гэж Ким Жон Ун ярьжээ.
1992 онд Хойд Солонгосыг үндэслэгч Ким Ир Сенийг бурхан мэт тахин шүтэх статуст ойртуулснаас хойш тус улсын Үндсэн хууль хэд хэдэн удаа өөрчлөгдсөн. Тухайлбал, коммунист үзэл суртлыг дахин тайлбарлах, цэрэгжсэн хөгжлийг үндэсний буян болгон батлах, Кимийн удмыг эрх баригч гүрний хувьд улам бэхжүүлэх зорилгоор Үндсэн хуулийг өргөнөөр засварласан.
ЭХ СУРВАЛЖ: FOX NEWS
