Монгол Улсын Донорын тухай хуулийн 13 дугаар зүйлийн 13.2 дахь заалтад “Монгол Улсын 21 насанд хүрсэн иргэн эрхтнээ бусдад шилжүүлэн суулгахыг зөвшөөрсөн шийдвэрээ өөрийн харьяа болон аль ч эрүүл мэндийн тусламж, үйлчилгээ үзүүлэх байгууллагад гарын үсгээр баталгаажуулан өгч, эрүүл мэндийн даатгалын гэрчилгээ, цахим картад тэмдэглүүлж болно” гэжээ.
Хэрэв та донор болохыг хүсвэл онлайнаар бүртгүүлэх боломжтой. Ингэхдээ Эрүүл мэндийн хөгжлийн төвийн Эс,эд, эрхтнийг шилжүүлэн суулгах үйл ажиллагааг зохицуулах албаны цахим сайтад хандан Донорын зөвшөөрлийн хуудсыг бөглөнө. Тус хуудаст:
- Ургийн овог
- Эцэг, эхийн нэр
- Өөрийн нэр
- Регистрийн дугаар
- Төрсөн өдөр
- Хүйс
- И-мэйл зэрэг асуулга багтжээ.
Донор болох хүсэлтээ цахимаар илгээсэн бол донорын картаа Эрүүл мэндийн хөгжлийн төвийн Эс, эд, эрхтэн шилжүүлэн суулгах үйл ажиллагааг зохицуулах албанаас ажлын цагаар /8:30-17:30/ очиж авах боломжтой. Холбогдох утас: 70110891
Мөн хэрэв та гэнэтийн осол болон тархинд цус харваж тархины үхэлд орсон тохиолдолд бусдын амь насыг аврах хүнлэг өгөөмөр сэтгэлийн үүднээс өөрийн эрхтнээ бусдад шилжүүлэн суулгахыг зөвшөөрч байвал ЭНД дарж бүртгүүлж болно.
Монгол улсад амьд болон тархины үхэлтэй донороос элэг, бөөр, ясны чөмөгнөөс үүдэл эс, нүдний эвэрлэг, бэлгийн эс зэрэг эс, эд, эрхтэнг шилжүүлэн суулгадаг. Тархины үхэлтэй донор буюу цус харвах, осол гэмтлийн улмаас тархи нь эдгэшгүйгээр бүрэн ажиллагаагүй болсон донорын эд эрхтнийг нь бусдад шилжүүлэн суулгаснаар найман хүний амийг аврах боломжтой байдаг аж.
