-2022 оных ₮116,000, 2023 оных ₮233,000 байх урьдчилсан тооцоолол гарчээ-
УИХ-ын 2023 оны намрын чуулганы хаалтын өдөр /2024.01.17/ Засгийн газраас өргөн мэдүүлсэн “Эрдэнэс Тавантолгой” хувьцаат компанийн хувьцааны талаар авах зарим арга хэмжээний тухай” Улсын Их Хурлын тогтоолын төслийн эцсийн хэлэлцүүлгийг хийж, баталсан.
Ингэснээр ЭТТ ХК 2012 оны дөрөвдүгээр сарын 11-нээс хойш төрсөн иргэддээ ногдол ашиг өгөх боломжтой болсон юм. Мөн шинээр хувьцаа авах 1 сая гаруй иргэнд 2022 оны ашгаас ногдол ашиг өгөх эсэх зарчмын шийдвэрүүд Засгийн газраас гарах аж.
Урьдчилсан байдлаар,
2022 оны ногдол ашгаас нэг иргэнд 116,000 төгрөг хуваарилагдах юм байна. Үүнийг сар шинийн баяраас өмнө олгох боломжтой гэж үзэж байна.
2023 оны ногдол ашгаас нэг иргэнд 233,000 төгрөг оногдох төлөвтэй. Үүнийг сар шинийн баярын дараа хуваарилах асуудал яригдана.
Учир нь 2023 оны ногдол ашгийн тайлан гараагүй. Хоёрдугаар сарын 10-нд гарна. Үүний дараа аудитын шалгалт орох процесс хуулийн дагуу өрнөнө. Ингээд дарөвдүгээр сард шийдвэр гарах аж.
Тэгэхээр эхний ээлжинд 2022 оныхыг хуваарилна. Харин, ирэх долоо хоног 2024 оны аудитлагдсан тайлан батлагдчихвал цугт нь шийдэх боломжтой гэдгийг эх сурвалж хэлж байна.
Ямартай ч энэ оны хагас жилээс өмнө 1072 хувьцаатай нэг иргэн 350,000 орчим төгрөгийн ногдол ашиг авахаар байгаа юм.
–ТУЗ энэ долоо хоногт хуралдаж, шийдвэр гаргана-
Аль алиных нь шийдвэрийг “Эрдэнэс Тавантолгой” ХК-ийн Төлөөлөн удирдах зөвлөлийн гишүүд шийдвэрлэнэ. ТУЗ энэ долоо хоногт хуралдах товтой байна.
ЭТТ ХК-ийн ТУЗ-ийн дарга:
- Ургамалын Бямбасүрэн Засгийн газрын Хэрэг эрхлэх газрын дэд дарга
ТУЗ-ийн гишүүд:
- Авсайн Мөнхбат Зам, тээврийн хөгжлийн яамны Хяналт-шинжилгээ, үнэлгээ, дотоод аудитын газрын дарга
- Лхагвабаярын Энх-Амгалан Эдийн засаг, хөгжлийн яамны Макро эдийн засгийн бодлогын газрын дарга
- Бавуугийн Пүрэвсүрэн “Эрдэнэс Монгол” ХХК-ийн Санхүүгийн төлөвлөлт, хөрөнгийн удирдлагын хэлтсийн менежер
- Мэлсчогийн Мэндбаяр Уул уурхай, хүнд үйлдвэрийн яамны Уул уурхайн бодлогын газрын дарга
- Хишигдоржийн Баасанхүү “Интелмайнд” ХХК-ийн Бизнес, үйл ажиллагаа эрхэлсэн дэд захирал
- Батринчингийн Бат-Эрдэнэ “My doctor”, “My parking” гарааны бизнесийн төсөл, “Чингис Жей” ХХК, “Каос” ХХК-д ментор зөвлөх
- Доржнамжилын Болор “Смарт дийл” ХХК-ийн Гүйцэтгэх захирал
- Батцэнгэлийн Хаш-Эрдэнэ Улаанбаатар хотын худалдааны танхимын Гүйцэтгэх захирал
гэсэн есөн хүн бий.
Компанийн үйл ажиллагааны төлөвлөгөөг баталж, гүйцэтгэх удирдлагыг чиглүүлэх, хянах үүргийг Төлөөлөн удирдах зөвлөл хэрэгжүүлдэг дүрэмтэй. Гол зорилго нь компанийн эцсийн үнэлэмжийг нэмэгдүүлэхэд чиглэх. Улс төрийн томилгоогоор ирсэн хүмүүс компанийнхаа эрх ашигт биш томилсон яам, байгууллагынхаа эрх ашигт үйлчилж ирсэн жишээнүүд бий.
ЭТТ ХК-ийн удирдлагын түүхэнд долоон гүйцэтгэх захирлын дөрөв нь “аавын” хаалга татжээ. Гэтэл эсрэгээрээ тэдний ард гол шийдвэр гаргадаг ТУЗ цэвэрхэн үлддэг. ТУЗ-ийн түүхэнд ганцхан “хүргэн” Г.Дэнзэн л “аавын” хаалга татаж байж.
