Европ даяар агаарын тээврээр үйлчлүүлсэн олон мянган зорчигч өөр улсад сэржээ. Учир нь Иша шуурганы улмаас нислэгүүдийн төлөвлөгөө өөрчлөгдөж, зарим нь цуцлагдан, зарим нь чиглэлээ өөрчлөв.
А цэгээс Б цэг хүрэх хамгийн хурдан арга бол мэдээж онгоцоор нисэх. Гэхдээ Ирланд, Их Британийн зорчигчдын хувьд Ням гаригийн шөнийн нислэг нь нэг төрлийн аялал болж хувирчээ. Ирланд, Их Британийн нисэх буудлууд ойролцоогоор 145 км/цаг хурдтай шуурганд өртөв.
Тиймээс олон нисэх онгоц Европ дотроо чиглэлээ өөрчлөн, аюулгүй газарт газардсан байна. “Ryanair” компанийн нислэгүүдэд шуурга онцгойлон нөлөөлсөн. Тодруулбал, Дублинд төвтэй тус компанийн 166 хөөрөх, буух нислэг цуцлагджээ. “Ryanair”-ын “FR555” нислэг л гэхэд Манчестерээс Дублин руу ниссэн боловч Парист буусан. Манчестер-Дублин чиглэлийн өөр нэг нислэг Их Британи, Ирландын хооронд гурван цаг гаруй нааш цааш явжээ. Эцэст нь газардах ёстой буудлаасаа 50-хан км зайд орших Ливерпулд буусан байна. Энэ мэтчилэн зарим онгоц нь анх хөөрсөн цэгтээ буцаад очсон тохиолдол ч гарчээ.
Нислэгийг хянах цахим хуудсууд хачин жигтэй маршрутын зургуудаар дүүрсэн байна. Ингээд Даваа гаригийн өглөө болоход бүх онгоц Европ даяар хаа сайгүй тарсан байжээ.
Их Британийн агаарын тээврийн хяналтын оператор компаниас мэдээлснээр хүчтэй шуурга зөвхөн нисэх онгоцны чиглэлээр тогтохгүй газрын тээвэрт ч нөлөөлсөн байна.
Эх сурвалж: CNN
