Хаан III Чарльзын эрүүл мэнд муу байгаа талаар сүүлийн хагас сарын турш хэвлэлээр мэдээлсний эцэст түүнийг хорт хавдартай гэдгийг зарлав. Цаг хугацааны дарааллыг доор харуулбал:
- Нэгдүгээр сарын 17-нд Хаан III Чарльз түрүү булчирхайн томролын улмаас эмнэлэгт хэвтэж эмчлүүлэх болсон гэж Букингемийн ордон мэдэгдэв.
- Нэгдүгээр сарын 26-нд Хаан III Чарльз Лондонгийн эмнэлэгт эмчилгээгээ эхэлсэн бөгөөд бие нь сайн байгаа гэж Хатан хаан Камилла мэдэгджээ.
- Нэгдүгээр сарын 29-нд гурав хоног эмчилгээ хийлгэсний эцэст Хаан III Чарльз эмнэлгээс гарав. Биеэ тэнхрүүлэхийн тулд олон нийтийн арга хэмжээнд оролцохгүй байх хэрэгтэй гэж Букингемийн ордон мэдэгджээ.
- Нэгдүгээр сарын 31-нд Хаан III Чарльз эмчилгээнийхээ дараа аль боломжоороо биеэ тэнхрүүлж байгаа гэж Хатан хаан Камилла хэллээ.
- Хоёрдугаар сарын 4-нд Хаан III Чарльз, Хатан хаан Камилла нар Сандрингемийн сүмд очжээ. Энэ нь эмчилгээнээс хойш Хаан III Чарльз анх удаа олны өмнө гарсан тохиолдол юм.
- Хоёрдугаар сарын 5-нд эмчилгээний явцад Хаан III Чарльз хорт хавдартай гэдэг нь оношлогдсоныг мэдэгдлээ. Мөн тогтмол эмчилгээ эхэлсэн гэв.
Хаан III Чарльз хорт хавдартай гэж зарласны дараа АНУ-ын ерөнхийлөгч Жо Байден, Францын ерөнхийлөгч Эммануэль Макрон, Европын парламентын тэргүүн Роберта Мецола, Ирландын ерөнхийлөгч Майкл Д Хиггинс, Австралийн ерөнхий сайд Энтони Албанез нарын удирдагчид санаа зовниж буйгаа илэрхийлж, эрхэм дээдэст эрүүл энхийг хүсчээ.
Их Британийн хэвлэлүүд өнөө өглөө Хаан III Чарльзын эрүүл мэндийн тухай мэдээллээр дүүрчээ. Хорт хавдрын оношийг зарласны дараагаас Букингемийн ордны гадаа хэвлэлийнхэн цугларч, мэдээлэл хийж эхэлсэн байна.
Их Британи даяар өдөрт 1000 орчим хүн хорт хавдартай гэж оношлогдож байна. Ихэнх хорт хавдрын эрсдэлт хүчин зүйл нь нас юм. Хаан III Чарльз 75 настай. Шинээр хорт хавдрын онош сонсож буй өвчтөнүүдийн 75 хувь нь 75 бас түүнээс дээш насныхан байдаг.
Эх сурвалж: BBC
