Франц улсын “Boury-en-Bresse” шоронд хоригдож буй Монгол Улсын иргэн Г.Ган-Очир болон Францын иргэн Жан Люс Бертин нар өнөөдөр утсаар шууд холбогдож, Монгол Улсын Ерөнхийлөгч У.Хүрэлсүх, Ерөнхий сайд Л.Оюун-Эрдэнэ, Засгийн Газрын Хэрэг Эрхлэх Газар (ЗГХЭГ)-ын дарга Д.Амарбаясгалан, Хууль зүй, дотоод хэргийн сайд асан Х.Нямбаатар, Нийслэлийн засаг дарга бөгөөд Улаанбаатар хотын захирагч асан Д.Сумъяабазар нарыг Нидерландын Гааг хотод төвтэй олон улсын эрүүгийн хэргийн шүүхэд өгсөн гомдлыг нь хүлээн авсан талаар “Монголньюс” мэдээллийн төвд хийсэн хэвлэлийн бага хурал дээр мэдэгдэв.
Энэ талаар иргэн Г.Ган-Очир “Миний бие хоёр асуудлаар олон улсын шүүхэд гомдол гаргасан. Эхнийх нь Монгол Улсын Засгийн газар болон дээр нэр дурдсан хүмүүсийн хулгайн асуудлаар хоёрдугаарт намайг Францын шоронд Монгол Улсын Засгийн газрын захиалгаар хорьж байгаа асуудлаар хандсан юм.
Олон Улсын Эрүүгийн Хэргийн Шүүх (ОУЭХШ)-д гаргасан миний өргөдлийг өнгөрсөн хоёрдугаар сарын 20-нд албан ёсоор хүлээн авч, хэрэг үүсгэх болсноо бичгээр мэдэгдсэн.
Монгол Улсыг тус шүүхэд өгсөн өргөдөлдөө “Монгол Улс нь Нэгдсэн Үндэсний Байгууллага (НҮБ)-д 1961 онд элсэн орсон цагаасаа хойш тус байгууллагын гишүүн орнуудын дагаж мөрдөх олон улсын гэрээ болон Хүний Эрхийн Түгээмэл Тунхаглал дагаж мөрдөх болсон билээ.
Манай улс 1921 онд тусгаар тогтнолоо зарласнаас хойш МАХН-ын удирдлагын дор 1990 оныг хүртэл 69 жил социалист нийгмийн замаар хөгжиж ирсэн. Ардчилсан хувьсгал ялсан 1990 оноос хойш хүний эрх, эрх чөлөөг эрхэмлэсэн, хувийн өмчийг хөгжүүлсэн, хүнлэг энэрэнгүй нийгмийг босгохоор парламентын засаглалтай болж эхэлсэн.
Гэвч дөрвөн жилд нэг удаа болдог УИХ-ын сонгууль болон Ерөнхийлөгчийн сонгуулийг луйвардах, будилаантуулах аргаар төрийн эрхийг авч, нэг нам буюу МАН-ын уршгаар урьдын адил ядуу зүдүү амьдарч, улсын гэх тодотголтой үйлдвэр, байгууламжуудыг сүйтгэж, эдийн засгийг дампууралд оруулсан билээ.
1992 оноос хойш найман удаа сонгууль болоход долоод нь МАН ялсан. 1992-2012 он хүртэлх таван удаагийн сонгуульд иргэдийн хувийн мэдээллийг ашиглаж саналын хуудсыг худал тоолох, луйвардах, СЕХ-д өөрсдийн гар хөлөө ажиллуулах аргаар төрийн эрхийг хууль бусаар авсан.
2012-2020 оны сонгуулийн системд нэвтэрсэн сонгуулийн санал тоолох “хар машин”-ыг өөрчилж янзалснаар өөрийн намд санал өгсөн мэтээр төрийн эрхийг атгаж байна. Үүний уршгаар гарын 10 хуруунд багтах цөөн тооны гэр бүл илтэд баяжиж, жирийн ард иргэд нь ядуу амьдарч, жагсаал цуглааныг хүчээр тараах аргаар эсэргүүцсэн нэгнийг нь урвагч хэмээн цоллож байна” гэх мэтээр 10 гаруй хуудас өргөдөл өгсөн.
Хоёр дахь асуудал нь намайг шоронд ямар үндэслэлээр хорьж байгаа талаар тайлбар өгөхгүй бол янз бүрийн худал мэдээлэл их гарч байгаа бололтой. Францын шүүхээс энэ талаар танилцуулах байдлаар тайлбар өгсөн. Танай Засгийн газраас шилжүүлэн авах хүсэлтийг хойшлуулж байгаа тул үргэлжлүүлэн хорьж байгаа гэдгийг мэдэгдсэн.
Францын Лион хотын шүүхийн шийдвэрийн дагуу хоригдоод нэг жил гурван сар боллоо. Шилжүүлэх хугацаа нь одоог хүртэл тодорхойгүй. Тиймээс Францын шүүхийг Люксембургэд төвтэй Европын Холбооны Олон улсын шүүхэд өгсөн, одоогоор ямар нэгэн албан бичиг ирээгүй байна. Ирэх долоо хоногт хүний эрхийг зөрчиж байгаа талаар дахиж гомдол гаргахаар төлөвлөж байна” гэж ярилаа.
