“PGL Major Copenhagen 2024” буюу CS2 тоглоомын Дэлхийн Аварга Шалгаруулах Тэмцээн (ДАШТ) Дани улсад болж байгаа билээ.
Нийт 1.2 сая ам.долларын шагналын сантай тус тэмцээн нь Open stage, Elimination Stage, Playoff Stage гэсэн гурван шаттайгаар энэ сарын 17-31-нд зохион байгуулагдана.
Тэгвэл манай улсын баг учраа таарсан эхний хоёр багтайгаа ВО1 журмаар тоглож хожигдсон. Үргэлжлүүлэн энэ Даваа гарагт тэмцээнээс хасагдах эсэхээ шийдэхээр ОХУ-ын AMKAL ESPORTS багтай тоглож 2:1 онооны харьцаатайгаар хожсон.
Улмаар Хятадын Lynn Vision багтай дэлхийн аваргын дөрөв дэх тоглолтоо өчигдөр хийж 2:0 онооны харьцаатайгаар ялалт байгуулжээ. Ингэснээр Open stage шатанд хоёр хожиж, хоёр хожигдсон амжилттайгаар аравдугаар байрт бичигдэж байна.
Энэ нь монгол багууд Counter Strike тоглоомын дэлхийн аваргад оролцож эхэлснээс хойш анх удаа хоёр хожил байгуулсан тохиолдол болсон юм.
Тэд “Elimination Stage”-д шалгарах эсэхийг шийдэх тоглолтоо өнөөдөр 20:00 цагт Бразилын Legacy багийн эсрэг хийнэ.
Хэрэв өрсөлдөгчөө хожвол Азийн тивээс оролцож буй баг анх удаа дэлхийн аваргын Elimination Stage шатанд шалгарсан тохиолдол болох юм.
Мөн CS2 тоглоомын дэлхийн аваргад Ази тивээс гурван баг оролцох эрхийг тэд авч ирнэ. Counter Strike тоглоомын дэлхийн аварга зохион байгуулагдаж эхэлснээс хойш Ази тивээс хоёр л баг оролцож байгаа.
