Агаарын тээврийн Japan Airlines компани анх удаа эмэгтэй гүйцэтгэх захиралтай болсон нь Японы томоохон компаниудын хувьд төдийгүй дэлхийн авиа компаниудын хувьд ховор тохиолдол болжээ.
Шинэ гүйцэтгэх захирал Мицүко Тоттори нь анх 1985 онд тус компанид нисэх онгоцны үйлчлэгчээр ажилд орж байсан гэнэ.
Тэрбээр дөрөвдүгээр сарын 1-нээс ажилдаа орох ба одоогийн гүйцэтгэх захирал Южи Акасака тус компанийн төлөөлөн удирдах зөвлөлийн даргын албан тушаалд шилжиж ажиллах ажээ.
Шинэ захирлын томилгоо Japan Airlines компанийн онгоц Токиогийн Ханеда буудалд өөр онгоцтой мөргөлдөн шатаж, 379 хүний амь насыг эрсдэлд оруулсан ослоос хойш хэдхэн хоногийн дараа хэрэгжиж байна.
2015 онд удирдах албан тушаалд анх дэвшиж байсан Тоттори аюулгүй байдлын асуудалд хамгийн их анхаарал тавьж ажиллахаа мэдэгджээ.
“Би ажил хөдөлмөрийн замналынхаа ихэнх хугацаанд зорчигчдын аюулгүй байдал, үйлчилгээнд анхаарч ажилласан. Үйл ажиллагааны аюулгүй байдал бол агаарын тээврийн компаниудын үндэс суурь юм. Би энэ зарчмыг тууштай баримтлан ажиллах болно” гэж Тоттори өчигдөр хэвлэлийн хурлын үеэр хэлсэн байна.
Тэр бас өөрийнх нь томилгоо эмэгтэйчүүдийн албан тушаалд өсөж дэвших тэмцэлд урам зориг өгнө гэдэгт итгэлтэй байгаагаа илэрхийлжээ.
FlightGlobal сайтын явуулсан судалгаанаас үзвэл 2022 оны сүүлийн байдлаар дэлхийн топ 100 авиа компанийн 12-ыг нь эмэгтэйчүүд удирдаж байна.
Энэ нь өмнөх жилээсээ хоёр дахин өссөн тоо юм.
Энэ сарын эхээр JetBlue Airways компанийн гүйцэтгэх захирлаар Жоанна Герати томилогдсон нь АНУ-ын агаарын тээврийн томоохон компанийг эмэгтэй хүн удирдах болсон анхны тохиолдол болжээ.
Япон улсын засгийн газар 2020 он гэхэд томоохон компаниудынхаа гуравны нэгийг эмэгтэй хүнээр удирдуулах зорилго тавьсан ч биелээгүй тул 2030 он болгож хойшлуулсан юм.
2021 оны байдлаар Японы бизнесийн байгууллагуудын удирдах албан тушаалын 13.2 хувийг эмэгтэйчүүд эзэлж байжээ.
Энэ нь Эдийн Засгийн Хамтын Ажиллагаа, Хөгжлийн Байгууллагын (OECD) гишүүн орнуудын дунд хамгийн доогуур үзүүлэлт юм.
Эх сурвалж: BBC
