ХААН банкнаас олон нийтэд санал болгон гаргаж буй хувьцааны анхдагч зах зээлийн арилжааны захиалгыг Монголын Хөрөнгийн биржээр дамжуулан энэ сарын 13-наас хүлээн авч эхлээд байгаа билээ. Ингэснээр IPO хийх системийн 5 банкнаас ХХБ, ХАС үлдээд байгаа аж.
ХАС банк одоогоор хувьцаагаа олон нийтэд гаргах хүсэлтээ СЗХ зэрэг холбогдох байгууллагад өгөөд буйг Монголбанкны ерөнхийлөгч Б.Лхагвасүрэн сэтгүүлчидтэй уулзах үеэрээ мэдээллээ. Түүнээс арилжааны банкууд зээл гаргахгүй байна гэсэн олон нийтийн санал гомдол, хүлээлтийн талаар тодруулахад, “Өнгөрсөн 2-3 дугаар сард зээл гарахгүй байна гэх гомдлыг иргэд гаргасан. Зээл олголт бага байсан нь банкууд IPO хийх гээд балансдаа анхаарч байсантай холбоотой” гэсэн хариуг өглөө.
Мөн “ХААН банкны захиалга эхэлснээр IPO хийх системийн 5 банкнаас ХХБ, ХАС үлдээд байна. Өнгөрсөн онд “Голомт” болон Төрийн банк хувьцаагаа олон нийтэд санал болгон арилжсан. ХААН банк одоо хувьцаагаа гаргаж буй тул зээл олголт дээр ямар нэг асуудал гарахгүй байх. Худалдаа Хөгжлийн банк, ХАС банк удахгүй IPO хийхээр дээрх хоёр банк зээлээ олгоод эхэлнэ. Нөгөө талд банкууд бизнесийн циклтэй уялдуулан зээлээ олгодог. Өөрөөр хэлбэл, дөрөвдүгээр сараас банкны зээл гараад эхэлсэн” гэдгийг Төв банкны тэргүүн мэдэгдэв.
