Газын зурвас дахь өдөр тутмын нас баралтын тоо сүүлийн үеийн түүхэнд байгаагүй хэмжээнд хүрснийг Их Британид төвтэй “Оксфам” байгууллага мэдээлээ. Тодруулбал, өдөрт амиа алдагсдын тоо 21 дүгээр зууны бусад томоохон мөргөлдөөнүүдээс давжээ.
“Оксфам”-ын мэдээлснээр Израилийн арми өдөрт дунджаар 250 хүний амийг хороож байгаа аж. Үүнийг бусад мөргөлдөөнтэй харьцуулбал, Сирид 96.5, Суданд 51.6, Иракт 50.8, Украинд 43.9, Афганистанд 23.8, Йеменд 15.8 хүн өдөрт дунджаар амиа алдаж байсан.
Амьд үлдсэн хүмүүсийн хувьд бөмбөгдөлтөөс гадна өлсгөлөн, өвчин, хүйтэн цаг агаар зэрэг олон өндөр эрсдэл байна. Тусламжийг хязгаарласнаар хямрал улам нэмэгдэж байна. Тодруулбал, долоо хоногт шаардлагатай хүнсний тусламжийн ердөө 10 хувь нь л ирдэг аж.
Аравдугаар сарын 7-ноос хойш 23469 палестин хүн амиа алдаж, 59604 хүн шархаджээ.
Сүүлийн 24 цагийн мэдээллээс шүүвэл Израилийн хүчин Газын зурвас 10 удаа цохилт өгсөн байна. Үүний улмаас 112 хүн амиа алдаж, 194 хүн шархдав. Мөн нуранги дор 7000 орчим хүн сураггүй байна.
Эх сурвалж: AL JAZEERA
