“Монгол Улсыг бүсчлэн хөгжүүлэх бодлогыг тодорхойлох арга хэмжээний тухай” УИХ-ын тогтоолын төслийн талаар УИХ-ын гишүүн Ж.Батсуурь “Яг үнэндээ энэ тогтоолын үзэл баримтлалд ойлгомжтой нэг ч үг үсэг байхгүй. Лондоноос, Сөүлээс хөдөө рүү тэгж нүүлгэсэн гэсэн хоёр жишээг л ярьж байна.
ЗГХЭГ, ХЗДХЯ, ЭЗХЯ гэсэн гурван том тамгатай тогтоолын төсөл хоёр жишээнд дээр тавигдаад хөдөө явж байгаа ажлын удирдамж юм шиг орж ирлээ.
Та бүхний ярьж буй зүйл зөрж байна. Г.Занданшатар ЗГХЭГ-ын дарга байхад энэ тогтоолын талаар хэлэлцүүлэг хийсэн. Гэтэл одоо дахиад хэлэлцүүлэг хийнэ гэж орж ирлээ, тоглоом юм уу.
Монгол Улсын бүсчлэн хөгжлийн талаар ямар нэгэн санаа оноо байхгүй. Гарын авлага аваад, чуулганы завсарлагаар бүсүүд дээр очих гишүүдийн сурталчилгааны мөнгийг Засгийн газраас гаргуулъя гээд биччихсэн тогтоол байна.
Үүнийгээ та нар тайлбарлаж чадахгүй, С.Бямбацогт нүдээ аниад дайраад байна. 20 жил хийгээгүй зүйл яагаад яаралтай горимоор орж ирээд байгаа юм” гэв.
Мөн Эдийн засаг, хөгжлийн яамны Бүс, орон нутгийн хөгжлийн бодлогын газрын дарга Д.Эрдэнэбаяр “Өнгөрсөн долоон жилийн хугацаанд ул суурьтай судалгаа, 21 аймгийн хэмжээнд хэлэлцүүлэг хийгдсэн. Одоо бол яамд, эрдэмтэд, улс төрийн төлөөллийг оролцуулсан хэлэлцүүлэг хийхээр Засгийн газраас шийдсэн. 2001 онд батлагдсан үзэл баримтлал онолын хувьд өөр болсон.
Тогтоолын төсөлд буй бүсчлэлийн схемийг харах боломжтой. Тус схем нь улс төрийн тойрогтой харьцуулбал 90 хувийн нийцтэй буюу эрдэмтдийн санал дээр суурилсан” хэмээн ярив.
16:06 2024/01/12
“Төрийн байгууллагуудыг бүсчлэн байршуулах тухай” тогтоолын төслийг УИХ-ын гишүүдийн олонх нь дэмжсэн тул анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлэв.
Тус төслийн хүрээнд УИХ-ын 2023 оны намрын ээлжит чуулган завсарлах хугацаанд бүсчилсэн хөгжлийн талаарх бодлого, хууль тогтоомжийг иргэд, олон нийтэд тайлбарлан таниулах, уулзалт, хэлэлцүүлэг зохион байгуулах аж.
Мөн Монгол Улсын эдийн засгийн бүсчлэлийг тогтоох асуудлаар эдийн засгийн форумыг бүсчлэн зохион байгуулах, холбогдох бодлого, хууль тогтоомжийн хэрэгжилтийн талаарх шаардлагатай мэдээллээр хангах арга хэмжээ авах талаар тусгасан байна.
15:32 2024/01/12
УИХ-ын намрын нэгдсэн чуулганы үдээс хойших хуралдаанаар Элчин сайд нарыг шинээр томилсон. Мөн Бүгд Найрамдах Узбекистан Улсын нийслэл Ташкент хотод Элчин сайдын яам нээн ажиллуулах тогтоолын төсөл батлагдсан юм.
Үргэлжлүүлэн Төрийн байгуулалтын байнгын хорооны өнөөдрийн хуралдаанаас ирүүлсэн “Төрийн байгууллагуудыг бүсчлэн байршуулах тухай” УИХ-ын тогтоолын төслийг хэлэлцэх эсэх асуудлыг хэлэлцэж байна.
