УИХ дахь Ардчилсан намын бүлгээс өнөөдөр /2024.04.01/ сэтгүүлчдэд мэдээлэл хийлээ. Тус бүлэг өнөөдрийн хуралдаанаараа Мэргэжлийн нэгдсэн холбооны тухай хуулийн төсөл, шинэ парламентын дэгийн асуудлаар мэдээлэл солилцсон байна. Гурвдугаарт Монгол Улсаас иргэд гадагшаа дайжиж байгаа асуудлаар байр сууриа нэгтгэжээ
УИХ-ын гишүүн Ж.Батсуурь:
-Сар шинийн дараагаас Монголын төр эзгүйрлээ. Хаврын чуулган эхэлсэн боловч байнгын хороод хуралдах боломжгүй, ирц хүрдэггүй. Хууль тогтоох дээд байгууллага ажлаа хийхгүй Монгол орон даяар тараад алга боллоо.
Ардчилсан намын бүлгээс өнгөрсөн хоёрдугаар сарын 20-нд хурал хийж, орон нутгийн нөхцөл байдал хүндэрснийг дуулгасан. Энэ үеэрээ Малчны зээлийн хүүг царцаах, эсвэл зээлийг нь тэглэх боломжгүй бол олон жил малчидтай гэрээ байгуулж ажилласан Хаан, Төрийн банкны даатгалын эрсдлийн сангаас хохирсон малчдад нөхөн олговор олгох, амьжиргаанаасаа салсан иргэдийн асуудлыг нэн даруй шийдэх чиглэлээр тодорхой арга хэмжээ авах хуулийн төсөл өргөн барих гэсэн ч УИХ-ын дарга зугтааж алга болоод сар боллоо. Хаана явж байгаа юм бүү мэд.
Монгол төр эзгүйрсэн, гаргаж байгаа шийдвэр нь ард иргэдэд байнгын дарамт болж очиж байна. Биднийг өвөлжилт хүндрэх нь гээд асуудлыг хэлэхэд арга хэмжээ авсан бол өчнөөн мянган иргэн амь амжиргаанасаа салахгүй байсан.
Биднийг мэдээлэл хийсний дараа эрх баригчид Хаан, Төрийн банкны удирдлагыг дуудаад асуудал шийдэж байгаа гэсэн. Гэтэл шийдэгдээгүй, эргээд банкаар дамжуулан малчдыг дарамталж байна. Нүглийн нүдийг гурилаар хуурч байна. Орон нутагт иргэд зургадугаар сарын 28-н хурдан болж, энэ хүмүүсээс салах юмсан. Амьдрал доройтлоо, үүнээс доошоо явах ч боломжгүй боллоо” гэж байна. Авлига бол түүхэнд байгаагүй дээд хэмжээндээ хүрсэн. Авлигын индексээр ичих төвшинд хүрсэн.
Одоо УИХ хоёр сарын хугацаанд ирцээ бүрдүүлж хуралдаад бидний өргөн барих гээд байгаа хуулийн төслийг хэлэлцээд Малчны зээлийг царцаавал царцаагаад, зээлийг нь тэглэвэл тэглээд, яг юу хийж чадахаас яс тас шийдмээр байна.
УИХ-ын гишүүн Н.Ганибал:
-Бид Малчны зээлийн асуудал, малжуулах тухай хуулийн төслийг УИХ-ын даргад өргөн барьж чадсангүй. Цаг товлоод байхад хоёр удаа зугтаачихлаа. УИХ-ын даргад тодорхой шаардлагыг энэ долоо хоногт хүргэнэ.
Хаврын чуулган эхэлснээс хойш чуулган асуудлуудаа хэлэлцэж чадсангүй. Бүс томорсон тул УИХ-ын гишүүд орон нутагт л ажиллаж байна. Чоно борооноор гэгчээр Үндсэн хуулийн Цэцийн тухай хуулийн төслийг Ардын намаас өргөн барьж, хэлэлцүүлэх оролдлого хийж байна. Метро барина л гэх. УИХ-ын гишүүд ямар мөнгөөр метро барих гээд байгааг мэдэхгүй байна.
Нийслэл Эрдэнэс Баянбогд гээд нүүрсний ордтой болсон. 66 хувийг нь нийслэл эзэмшдэг. Энэ ордын нөөцийг тогтоох хайгуулын ажилд шаардлагатай төсвийг нийслэлийн төсөв дээр суулгасан. Хайгуулын ажил дээр нууцын гэрээ байгуулаад Хятадын компаниудын төлөөлөл ирээд хяналтаа тавьж байна. Бид бүхэн мэдэж байх ёстой орд дээр гадны компани хяналтаа тавиад байна.
УИХ-ын гишүүн Д.Ганбат:
-Ерөнхий сайд найман жилийн ажлаа дүгнэж ярьж байх шиг байна. Хүмүүсийн амьдрал дээшилсэнгүй. Нэг ч үйлдвэр завод ашиглалтад орсонгүй. Монгол Улсын иргэдийн 30 хувь нь ядуу байсан бол одоо дээр нь 20 хувь нэмэгдэх болж байна. Эрх баригчид авлига албан тушаалын хэрэгтэй амаараа л тэмцэж байна. Мөн биенээ хуурах контентыг бүтээж цацаж байна.
Засгийн газрын мөрийн хөтөлбөрийн биелэлт 60-70 хувьтай гэлээ. УИХ -ын 80 хувийг эзэлдэг, 300 мянган төрийн албан хаагч, 20 гаруй сайдтай Засгийн газар ийм зүйл ярьж болох уу. Иргэдтэй уулзаад явж байхад сайн сайхан хэлж байгаа юм алга. Бусад улс орны залуучууд иргэд хэчнээн боломжийн амьдарч байгааг бид мэднэ. Монголчуудаас 300 мянга нь гадаадад ажиллаж амьдарч байна. Бараа бүтээгдэхүүний үнэ өссөн, авч байгаа цалин хөлсөө харахад маш хүнд байгаа гэлээ.
