“Эрдэнэс Тавантолгой” ХК-ийн бүрэн эрхт төлөөлөгч Ж.Ганбатаас тодрууллаа.
-Та БЭТ-ийн хувьд ногдол ашиг тараах тал дээр та ямар суурьтай байна вэ?
-2022 оны ногдол ашгийг өгөх асуудал яригдаж байгаа. ТУЗ-ийн хурал дээр танилцуулаад, хувьцаа эзэмшигчдийн хурлаар шийднэ. 2023 оных нь хоёрдугаар сарын 10-нд санхүүгийн тайлан гараад, аудит ороод дөрөвдүгээр сараас яригдана. Бид ямар ч байсан эхний ээлжинд 2022 оны ногдол ашгийг иргэдэд олгох асуудлыг судлаад, шийдвэрлүүлэх талд байгаа. УИХ-аар одоо орох асуудал шийдэгдвэл бид бүх хүнд өгөх үү, эсвэл 2012 оны дөрөвдүгээр сарын 11-нээс өмнө төрсөн 2.5 сая иргэнд өгөх үү гэдэг асуудал яригдана.
-Нэг хүнд хэдэн төгрөг олгогдохоор байгаа вэ?
-Нэг хүнд 110-120 мянган төгрөг олгогдохоор байгаа.
-Өрний асуудал яригдаж байгаа юм билээ?
-Эрдэнэс Тавантолгойд онцгой дэглэм тогтоох үед 4 их наяд гаруй төгрөгийн өр байсан. Бид энэ өрийг аль болох багасгаад бууруулаад явж байгаа. Одоо 2 их наяд орчим төгрөгийн өр бий. Үүнийг яаралтай бууруулах шаардлага байгаа. Нөгөө талдаа баяжуулах үйлдвэрээ ашиглалтад оруулах шаардлагатай байна. Тавдугаар сард ашиглалтад оруулахаар шахаад ажиллаж байна. Энэ үйлдвэр ашиглалтад орвол одоо зарж байгаа үнэ дээрээ 50-60 ам.доллар нэмж олох бүрэн боломжтой болно. Баяжуулах үйлдвэрт угаагаад гаргавал илүү үнэд хүрнэ. Үүн дээр л анхаарч ажиллаж байна.
-2022 оны ногдол ашгийг Цагаан сараас өмнө өгч амжих уу?
-УИХ-аас шийдвэр гарчихвал бид амжина. Амжуулахын тулд бид ажиллаж байна.
-Бэлэн мөнгө тараахаас өөр саналууд тавигдсан уу?
-УИХ-аас шийдвэр гарвал бид Засгийн газарт саналаа тавина. Эхний ээлжинд 2022 оны ногдол ашгийг бэлэн мөнгөөр л өгөх байх.
