Индонезын Жакарта хотод болсон буудлага спортын Ази Тивийн Аварга Шалгаруулах Тэмцээн (ААШТ)-д амжилттай оролцож олимпын хос эрх авсан билээ.
Тодруулбал гар бууны 10 метрийн дасгалд Э.Даваахүү, гурван байрлалаас буудах 50 метрийн дасгалд Н.Баяраа нар “Парис 2024” олимпод оролцох эрхтэй болсон юм.
Азийн АШТ-д Э.Даваахүү 25 метрийн дасгалд мөнгө, 10 метрийн дасгалд хүрэл медаль хүртсэн бол эмэгтэй урт бууны 50 метрийн багийн төрөлд О.Янжинлхам, Ч.Нарантуяа, О.Есүгэн нар мөнгөн медаль хүртсэн.
Тивийн АШТ-д амжилттай оролцож олимпын эрх авсан хоёр тамирчныг Биеийн Тамир Спортын Улсын Хороо (БТСУХ)-ны удирдлагууд Хүндэтгэлийн танхимд хүлээн авч, уулзаж ярилцлаа.
Энэ үеэр Н.Баярааг “Спортын тэргүүний ажилтан” цол тэмдгээр шагнасан юм.
Бид Н.Баяраа, Э.Даваахүү нартай цөөн хором ярилцсан юм.
– Олимпын эрх авсанд баяр хүргэе. Өмнө нь Лондоны олимпод оролцож байлаа. Энэ удаад Парисыг зорих нь. Сэтгэгдэл хэр байна вэ?
-Индонезын Жакарта хотод болсон ААШТ-д тавдугаар байр эзэлснээр олимпын эрхээ авлаа. Тивийн шилдгүүд цугласан чухал тэмцээнээс медаль хүртээгүй ч эрхээ авсандаа баяртай байна. Олимпын эрхийн тэмцээний бэлтгэлээ Үндэсний шигшээ багийн бэлтгэл сургуулилалтын төв дээр хангалаа.
– Буудлагын спортоор хичээллээд удаж байгаа юу?
– Энэ спорттой амьдралаа холбоод 19 жил, шигшээ багийн тамирчин болоод 15 жил болж байна. Өмнө нь Лондоны олимпод 20 насандаа оролцож байв. Тэгэхэд финалд шалгарахад цөөн оноо дутаж байсан. Илүү туршлага хуримтлуулсан тул өмнөх алдаагаа давтахгүй, Парист чамбай оролцохоор бэлдэж байгаа.
-Жакартад ямар зорилго тавьж байв?
– Заавал медаль авна, олимпын эрх авчирна гэж өөрийгөө зовоохыг хүсээгүй. Сэтгэл санаагаа тайван байлгаж тэмцээндээ илүү анхаарал хандууллаа. Үүний үр дүнд зорьсондоо хүрлээ. Олимпод оролцохоос өмнө Европын тэмцээнээр явж бэлтгэлээ базаана. Ирэх дөрөвдүгээр сард олимпын эрх олгох сүүлийн тэмцээн болох юм.
Э.ДАВААХҮҮ: ОЛИМПЫН БЭЛТГЭЛЭЭ ЕВРОПД БАЗААНА
– ААШТ-ээс мөнгө, хүрэл медаль хүртэж олимпын эрхээ авсанд баяр хүргэе. Хоёр олимп дараалан оролцохоор боллоо. Сэтгэгдэл хэр байна вэ?
– Баярлалаа. Өмнө нь “Токио 2020”-д цэц сорьсон бол одоо Парисын эрхээ авсандаа баяртай байна. Олимпын эрх олгох тэмцээнийг сүүлд зарлахаас өмнө ААШТ бидний хувьд сүүлийн боломж гэсэн ойлголттой байсан тул их хичээж бэлтгэлээ базаалаа. Тэгээд олимпын дасгал болох 10 метрийн хийн гар бууны ангилалд хүрэл медаль хүртэж олимпын эрхээ авсан. Дараа нь 25 метрийн хийн гар бууны дасгалд мөнгөн медаль хүртлээ. Сүүлд дөрөвдүгээр сард болох олимпын эрх олгох сүүлчийн тэмцээн зарлагдсан юм.
– Бэлтгэл дээр буудах, тэмцээнд цэц сорих хоёр ондоо байдаг. Энэ удаагийн тэмцээнд бэлтгэл дээрх шигээ буудаж чадав уу?
– Бэлтгэлээсээ дунджаар гурван оноо дутуу буудлаа. Өмнө нь Токиогийн олимпод оролцоход цагийн зөрүү байгаагүй. Энэ удаа зургаан цагийн зөрүүтэй газар очно. Тиймээс олимпоос өмнө Европын тэмцээнээр явж, бэлтгэлээ базаана.
– Буудлагын төрөлд Энэтхэгийн тамирчид маш сайн байна. Ялангуяа эрэгтэйчүүд дасгалд тэд илүүрхэж байгаа. Энэтхэг тамирчдын гоц гойд амжилт юутай холбоотой вэ?
– Ер нь Энэтхэг гэлтгүй Азийн тамирчид буудлагын төрөлд шилдэгт тооцогддог. Хүн ам олон, буудлагын спортоор бэлтгэл хийж буй тамирчдын тоо их. Хэдэн мянган хүнээс онцгойрч байгаа тамирчид нь дэлхийд тэргүүлж байна.
