Кино урлагийн дээд сургуулийн захирал Ж.Солонго нь оюутнаа зодож, биед нь халдсан талаарх мэдээлэл, бичлэг цахим орчинд олны анхаарлыг татаад байна.
Үүнийг нягталбал, КУДС-ийн хоёрдугаар курсын оюутан 19 настай Б-г 2023.03.07-ны өдөр сургуулийн үүдээр орох гэтэл тодорхой шалтгаангүйгээр зодож биед нь гэмтэл учруулж, биеийн ил хэсгүүдэд сорви үүсгэсэн талаарх баримт бүхий зураг цахим орчинд тавигдсаныг үндэслэж цагдаагийн байгууллагаас КУДС-ийн захирал Ж.Солонгыг шалгаж арга хэмжээ авсан байна.
Ж.Солонго 1997 оны гуравдугаар сард Төрийн өмчийн хорооны даргын тушаалаар “Монгол кино үйлдвэр”-ийн захирлаар томилогдсон байдаг.
Түүнд холбогдох “Монгол кино” нэгтгэлийн хөрөнгийг албан тушаалаараа далайлган, өөртөө унацтайгаар ашиглаж, эд хөрөнгийн дансыг дур мэдэн хувьдаа зарцуулсан гэх 16 баримт байгааг эх сурвалжууд мэдээлж буй. Эл баримтуудыг ил болгосон хоёр ажилтан халагдаж, “Монгол кино” үйлдвэр түүхийн маш ховор эд зүйлсээ алдсан аж.
Мөн кино үйлдвэрийн байрыг түрээслэн, сургалт явуулж байсан “Харцага” кино урлагийн дээд сургуулийг хааж, одоогийн КУДС-ийн суурийг тавьсан гэдэг. Гэвч төрийн нэрээр байгуулагдсан КУДС тун удалгүй хувийн сургууль болж, 50 орчим хувь нь Ж.Солонгын эзэмшилд очсон. Түүний өмч хөрөнгийг баталгаажуулсан буюу КУДС-ийг байгуулахад хөрөнгийнх нь 50 хувийг Ж.Солонго хувиасаа гаргасан гэсэн баталгааг Төрийн өмчийн хороо гаргаж өгсөн байдаг.
Түүний хувьд оюутнуудаа дарамталдаг, ёс зүйгүй харьцдаг, биед нь халддаг гэх яриа бий. Тэгвэл өнгөрсөн оны гуравдугаар сарын 07-нд түүний бусдад гар хүрч буй бичлэг цахим орчинд ил болсон аж.
