Хойд Солонгос улс цөмийн зэвсгийн араас хөөцөлдөж байгаа талаар Өмнөд Солонгосын ерөнхийлөгч Юн Сук Ёл саяхан байр сууриа илэрхийлсэн. Харин ОХУ-ын Гадаад хэргийн яамны хэвлэлийн төлөөлөгч Мария Захарова Өмнөд Солонгосын ерөнхийлөгчийн мэдэгдлийг “үл бүтэх”, “ялгаварлаж, алагчилсан” мэдэгдэл гэж нэрлэжээ.
Оросын тал ийн мэдэгдсэн нь Сөүл, Москвагийн харилцаанд сөргөөр нөлөөлнө гэж үзэж байна. Тиймээс Өмнөд Солонгосын Гадаад хэргийн яам Бямба гаригт Сөүл дэх Оросын Элчин сайд Георгий Зиновьевыг дуудаж, гомдол гаргажээ.
Өмнөд Солонгосын Гадаад хэргийн яамны Улс төрийн асуудал эрхэлсэн орлогч Жунг Бён Вон хэлэхдээ “ОХУ Юн Сук Ёл ерөнхийлөгчийн үгэнд дургүйцэх нь хоёр орны харилцаанд сөргөөр нөлөөлнө. Өмнөдийн ерөнхийлөгчийн үгийг ийн туйлын бүдүүлгээр шүүмжилж, үнэнийг үл тоомсорлон, ямар ч болзолгүйгээр Хойд Солонгосыг хамгаалж байгаад үнэхээр харамсаж байна. Энэ нь хоёр улсын харилцааг улам дордуулна” гэв.
Эх сурвалж: REUTERS
