Өмнөд Солонгосын тэргүүн хатагтай Ким Кён Хи өнгөрсөн оны есдүгээр сард Кристиан Диор брэндийн гурван сая воны үнэтэй цүнх бэлгэнд авсан нь Юн Сук Ёлын засгийн газрыг асуудалд оруулаад буй.
Ерөнхийлөгч Юн Сук Ёл Лхагва гаригт энэ талаар мэдэгдэл хийхдээ “Тэргүүн хатагтай нууц камераар зэвсэглэсэн хүнд хүйтэн сэтгэлээр татгалзаж чадаагүй. Хэрвээ үүнийг асуудал гэж нэрлэж байгаа бол харамсалтай л байна. Улс төрийн зорилготой үйлдэл гэдэгт нь бус дахин ийм зүйл давтагдахгүйн төлөө тодорхой хил хязгаарыг тогтоох хэрэгтэй” гэжээ.
Пастор Чой Жэ Ёны өгсөн цүнхийг тэргүүн хатагтай хүлээж авсныг Ерөнхийлөгчийн тамгын газар баталсан. Цүнхийг өдгөө засгийн газрын өмч болгон хадгалж байгаа ажээ.
Өмнөд Солонгосын парламентын сонгууль дөрөвдүгээр сарын 10-нд болно. Уг сонгуулиас өмнө Юн Сук Ёл хариуцлага хүлээх ёстой гэж олон нийт үзэж байна.
Өмнөд Солонгосын хуулиар төрийн албан хаагчид болон тэдний эхнэр, нөхөр нь нэг удаадаа нэг сая вон, санхүүгийн жилийн хугацаанд гурван сая воноор үнэлэгдэх бэлэг авахыг хориглодог. Чой Жэ Ёны хувьд уг бичлэгийг санаатай хийжээ. Тэрбээр Ким Кён Хиг эрх мэдлээ байнга урвуулан ашигладаг, Ерөнхийлөгчийн Тамгын газрын бүх системийг хувьчилж, монопольчлодог гэж үзсэн учраас бичлэг хийхээр шийдсэн байна.
Эх сурвалж: YONHAP
