Монголд допингийн эсрэг тэмцэхэд ганц гай болж байгаа байгууллага нь өнөөх МОНАДА буюу Монголын үндэсний допингийн эсрэг байгууллага. Угтаа допингийн эсрэг тэмцэж, суртал ухуулга явуулах ёстой ч байгуулагдсан цагаасаа допингийг хөхүүлэн дэмжиж, олигтой ажил хийгээгүй гэж хэлж болох. Жилийн өмнө л шинэ тэргүүнтэй болж, Монголыг Парисын олимпоос хасагдах аюулаас аварч чадсан ч хууль зөрчсөн нь тодорхой болж, улсын бүртгэлээс хасагджээ.
2024 оны хоёрдугаар сарын 22-ны өдөр Монголын үндэсний допингийн эсрэг байгууллага нэрээ Допингийн эсрэг төв болгон өөрчилжээ. Гэвч удирдах зөвлөлийн дарга гэх хуучин тэргүүн Ж.Хатанбаатар, шинэ тэргүүн Ц.Уугангэрэл нарыг хасчээ. Ингээд допингийн эсрэг төв улсын бүртгэлээс хасагдав. Хамгийн сонирхолтой нь улсын бүртгэлээс хасагдсан байгууллага өнөөдөр/2024.02.27/ удирдах зөвлөлийн хурлаа зарласан аж.
Эцсийн өмчлөгч, хувь эзэмшигч, удирдах албан тушаалтангүй болсон, бүртгэлгүй, чадамжгүй допингийн эсрэг төв хурал зарласан нь тун хачирхалтай. Улсын бүртгэлд бүртгэлгүй байгууллага хурал зарлах эрхгүйгээс гадна тус хуралд оролцох гишүүд нь хууль бус, хэлэлцэх асуудал нь хууль бус, гарсан шийдвэр нь мөн л хууль бус болж таарна.
ЯАГААД МОНАДА ХУУЛЬ БУС БОЛЖ, УЛСЫН БҮРТГЭЛЭЭС ХАСАГДСАН БЭ?
Энэ бүхэн өнөөх л Ж.Хатанбаатартай холбоотой. Тэрбээр 2010 онд Монголын үндэсний допингийн эсрэг байгууллагыг үүсгэн байгуулахдаа гишүүдийн гарын үсгийг хуурамчаар үйлдэн өөрийгөө үүсгэн байгуулагч статустай улсын бүртгэл бүртгүүлжээ. Гэтэл WADA буюу Дэлхийн допингийн эсрэг агентлагийн дүрмэнд допингийн эсрэг байгууллага нь тухайн улсын үндэсний олимпийн хорооны байгуулсан байгууллага байна гэж заасан хэрэг. Өөрөөр хэлбэл, хувь хүн тус байгууллагыг үүсгэн байгуулах, өмчлөх эрхгүй. Анхнаасаа хууль зөрчсөн байтал Ц.Уугангэрэлийг өнгөрсөн жил шинэ тэргүүнээр сонгож, Ж.Хатанбаатар өөрийгөө хүндэт ерөнхийлөгч болгосон гэх. Анхнаасаа буруу суурин дээр өөрчлөн шинэчлэгдсэн учир бүхэлд нь хүчингүй болгохоос өөр аргагүйд хүрэв.
МОНАДА-Г ӨӨРЧЛӨН ШИНЭЧЛЭХ ЯМАР ГАРЦ БАЙГАА ВЭ?
Дэлхийн допингийн эсрэг дүрэмд үндэсний допингийн эсрэг байгууллага нь холбогдох хууль тогтоомжид өөрөөр заагаагүй бол үндэсний олимпийн хороо нь өөрөө байж болно эсвэл түүний байгуулсан ТББ байж болно. Дэлхийн допингийн эсрэг агентлагийн бүтцэд нь өвлийн спортын холбоод, зуны спортын холбоод, олон улсын олимпийн болон паралимпийн хороо, тамирчдын комиссоос тус тус төлөөлөл байдаг. Сонирхол нь допинг дээр нэгдэж, эрх ашгаа хамгаалах үүднээс тал бүрийн төлөөллийг багтаадаг. Тиймээс Засгийн газрын зүгээс олимпийн хороо, паралимпийн хороо, спорт холбоодыг цуглуулж, удирдах зөвлөлийг нь шинээр бүрдүүлэх нь илүү тохиромжтой хувилбар.
