Цэргийн эрхтнүүд Чилийн төрийг эргүүлсний дараа 1973 онд Нобелийн шагналт яруу найрагч Пабло Неруда нас барсан юм.
Өчигдөр Чилийн давж заалдах шатны шүүх түүний нас барсан шалтгааныг мөрдөн шалгах ажлыг дахин эхлүүлэх шийдвэр гаргажээ.
Неруда агсны гэр бүлийнхэн болон Чилийн Коммунист Намын хүсэлтээр ийм шийдвэр гаргасан байна.
Өнгөрсөн онд олон улсын шинжээчдийн баг яруу найрагчийн үхлийн мөрөөр хийсэн ажлынхаа тайланг Сантьяго хотын давж заалдах шатны шүүхэд хүлээлгэж өгсөн юм.
Канад, Дани улсуудын лабораторид хийсэн шинжилгээний үр дүнг агуулсан уг тайлан одоогоор нийтэд ил болоогүй байгаа.
2017 онд шүүх эмнэлгийн хэсэг мэргэжилтнүүд Неруда зөвхөн хорт хавдрын улмаас нас бараагүй, гуравдагч этгээдийн оролцоо байсан байж болзошгүйг мэдэгдэж байжээ.
17 жил тогтсон генерал Августо Пиночетын дэглэмийн эхлэл үед буюу 1973 оны есдүгээр сарын 29-нд нас барахдаа Неруда нь Чилийн Коммунист Намын төв хорооны гишүүн, дэлхий дахинд танигдсан Чилийн хамгийн том сэхээтэн гэгдэж байв.
Тэрбээр өөрийн холбоотон, социалист ерөнхийлөгч Сальвадор Алендег эрх мэдлээ цэргийнхэнд булаалгахаас хоёр жилийн өмнө буюу 1971 онд Нобелийн утга зохиолын шагналыг хүртэж байжээ.
Санта Мариа эмнэлэгт хэвтэж байсан Нерудад цэргийн дэглэмийн нууц албаныхан үхлийн тариа шахсаныг яруу найрагчийн жолооч асан Мануэл Араяа гэрчилж байсан юм. Давж заалдах шатны шүүх өчигдрийн шийдвэртээ Араяагийн мэдүүлгийг дурдаагүй байна.
Эх сурвалж: Reuters
