Засгийн газраас хэрэгжүүлж буй “Таван Ш” ажиллагааны нэг “Шүүр” ажиллагааны хүрээнд төрийн албанд хууль бусаар томилогдсон, холбогдох хууль дүрэм болон төрийн албан хаагчийн шаардлага хангаагүй хүмүүсийг ажлаас нь чөлөөлж байгаа. Энэ ажлын хүрээнд өнгөрсөн сарын эхэнд 2000 хүнийг чөлөөлөөд байгааг Засгийн газрын хэрэг эрхлэх газрын дарга Д.Амарбаясгалан хэлж байсан.
Тэгвэл өнгөрсөн 7 хоногийн байдлаар улсын хэмжээнд 3000 гаруй байгууллагаас ЗГХЭГ-т мэдээлэл ирүүлэх ёстой бөгөөд 1343 байгууллагаас мэдээллээ ирүүлсэн байна. Мөн үүний 1163 нь тодорхой зөрчилтэй байгаа учраас 187 албан тушаалтныг чөлөөлж, 27 хүнд сахилгын арга хэмжээ авч, 172 зөрчлийг арилгуулсан гэх мэдээллийг мөн ЗГХЭГ-ын дарга Д.Амарбаясгалан өгсөн юм.
Харин зарим гишүүдийн хувьд, Засгийн газраас хэрэгжүүлж буй “Шүүр” ажиллагаанаас болж хөдөө орон нутагт ажиллах боловсон хүчингүй болж байгаад шүүмжлэлтэй хандаж байна.
Учир нь хөдөө орон нутагт төрийн албан хаагчийн ангилал, зэрэглэл, цалин хөлсний ялгамжтай байдал, шатлал алдагдсан. 330 сумаас 312 суманд нь төрийн албан хаагчдын орон тоо дутуу байгаа гэдгийг Төрийн албаны зөвлөлөөс мэдээлсэн. Гэтэл дээр нь “Шүүр” ажиллагаа явуулснаас болж хөдөө орон нутагт боловсон хүчний дутагдалд орж эхэлжээ. Тиймээс “Шүүр” ажиллагааг торон нутагт бус төвлөрсөн газарт явуулахыг гишүүд сануулав.
Энэ тухай УИХ-ын гишүүн Б.Дэлгэрсайхан “Хөдөө орон нутагт ажиллах боловсон хүчин бараг олдохгүй болсон. Шүүр ажиллагаагаар баахан хүнийг халж солих юм байна. Халж болно оо. Гэхдээ хэн ажиллах юм бэ. Хөдөө орон нутагт ярьж байгаад боломжийн хүнээ л тавьж байгаа шүү дээ. Уг нь энэ Шүүр ажиллагаагаа Улаанбаатар, төвлөрсөн газартаа хийх ёстой юм. Гэтэл хөдөө орон нутагт байгаа цэцэрлэгийн эрхлэгч, сургуулийн захирал гээд жижиг сум, орон нутгийн юмаар Шүүр ажиллагаа хийгээд юу шалих вэ. Эзнээ олмоор байна” гэсэн юм.
