“Эрдэнэт үйлдвэр” ТӨҮГ-ын ерөнхий инженер Т.Батмөнх болон Я.Дамдиндорж, Б.Баасандорж, Б.Энхбаатар, Д.Сэлэнгэ, Д.Болортуяа нарт холбогдох эрүүгийн хэргийн шүүх хуралдаан 2023 оны 5 сарын 24-нд товлогджээ.
Тэрээр 2021 онд “Эрдэнэт үйлдвэр” ТӨҮГ-аас үндсэн хөрөнгө актлахдаа 292 сая төгрөгийн үнэлгээтэй Lexus LX-570 машиныг 16 сая төгрөгөөр худалдсан байна. Тус машины хуримтлагдсан элэгдэл 240 сая, үлдэх өртөг нь 52 сая боловч худалдах доод үнийг 15 саяаар үнэлж, 16 саяд худалджээ.
Өөрөөр хэлбэл, элэгдлээ хасаад 52 сая төгрөгөөр худалдах боломжтой машиныг 15 саяаар нээлттэй дуудлага худалдаанд оруулахаар Төрийн өмчийн бодлого зохицуулалтын газрын (ТӨБЗГ) 2021 оны 5 дугаар сарын 20-ны өдрийн 170 тоот тогтоол гарсан байна. Эл тогтоолд дурдсанаар нийт 1,1 тэрбум төгрөгийн үнэлгээтэй 19 машиныг акталж, 55 сая төгрөгөөр дуудлага худалдаанд оруулжээ.
Мөн зарим хэвлэл мэдээллийн хэрэгсэлд дурдсанаар Т.Батмөнх нь дээрх хэрэгт яллагдагчаар хамт татагдсан нэр бүхий мэргэжилтэнүүдэд дуудлага худалдааг олон нийтэд мэдээлэхгүй байх чиглэл өгсөн гэх бөгөөд түүний жолооч Б.Энхбаатарын хамаарал бүхий хүн дуудлага худалдаагаар тус машиныг 16 сая төгрөгөөр авч, 120 саяаар бусдад худалдсан гэх мэдээлэл байна.
Хэрэв Эрүүгийн хуулийн 22.8.1.5 дахь хэсэгт зааснаар “Төрийн өмчийн, төсөвт байгуулагын эд хөрөнгийг зах зээлийн дунджаас доогуур үнээр борлуулсан” нь тогтоогдвол нийтийн албанд ажиллах эрхийг 2-5 жил хүртэлх хугацаагаар хасаж 5,4 саяас 27 сая төгрөгөөр торгох, эсхүл 1-5 жил хүртэл хугацаар зорчих эрхийг хязгаарлах, эсхүл 1-5 жил хүртэл хугацаагаар хорих ял оноох магадлалтай юм.
Т.Батмөнх нь 1989 оноос “Эрдэнэт үйлдвэр” ТӨҮГ-т ажиллаж эхэлсэн бөгөөд 2018 оны зургадугаар сараас одоог хүртэл Ерөнхий захирлын нэгдүгээр орлогч, Ерөнхий инженерийн албан тушаал хашиж байгаа юм. Түүний өнгөрсөн оны хөрөнгө оруулгын мэдүүлгийг харвал жилийн орлого 322 сая, орон сууц 4, хашаа байшин 1, үйлчилгээний зориулалттай барилга 2, граж 1 нийт 2,8 тэрбумын үл хөдлөх хөрөнгө, 380 саяар үнэлэгдэх 2 машин, 189 сая төгрөгөөр үнэлэгдэх газар, 388 саяар үнэлэгдэх мал, 390 саяын үнэ бүхий үнэт эдлэл, 245 сая төгрөгийн хадгаламж зэрэг нийт хөрөнгө 4,2 тэрбум хэмээн мэдүүлжээ. Өөрөөр хэлбэл тэрээр жилд Ерөнхийлөгчөөс ч илүү орлоготой бөгөөд жирийн нэг төрийн албан тушаалтан насаараа цуглуулаад барахгүй энэ их хөрөнгийн эх үүсвэрийг мөн шалгах ёстой болов уу.
Төрийн албан хаагч нь Төрийн албаны тухай хуульд зааснаар ашиг сонирхлын зөрчлөөс ангид байж, ардчилсан ёс, шударга ёс, эрх чөлөө, тэгш байдал, үндэсний эв нэгдлийг хангах, хууль дээдлэх зарчмуудыг үйл ажиллагаандаа мөрдлөгө болгох, НАНБХАСЗАСЗУС тухай хуульд зааснаар ашиг сонирхлоос ангид байх үүрэгтэйг энд мөн дурдъя.
