“Гэмтэгсдийг аврах эмнэлэг хүртэлх сургалт”-ыг дөрвөн өдрийн туршид ЭМЯ, Монголын Яаралтай Тусламжийн Нийгэмлэг, Иргэн цэргийн харилцааны дэмжлэгийн багууд хамтран Spirit of America-н санхүүжилттэйгээр Монгол улсын эрүүл мэндийн тогтолцоог шинэчлэх, эмнэлгийн өмнөх гэмтлийн тусламж үйлчилгээний нэн чухал дутагдлыг арилгах зорилгоор хоёр дахь удаагаа зохион байгууллаа.
Тодруулбал, эмнэлэг хүртэлх тусламж нь зөвхөн түргэн тусламж бус алсын дуудлага ордог байна. Монгол улсын 330 сумын бүхий л эмч, ажилчид энэхүү тусламжийг үзүүлдэг учир тэдгээрийг бэлтгэхэд энэхүү сургалтын ач холбогдол оршино.
“Уг сургалтыг Үндэсний гэмтэгсдийг аврах эмнэлэг хүртэлх түргэн тусламж үзүүлэгчдийн холбоо болон Spirit of America байгууллагаас дэмжлэг аван хэрэгжүүллээ. Учир нь Монгол улсад энэ салбарын мэргэжилтнүүдийг бэлтгэх хөтөлбөр сургалт одоогоор байхгүй байна. Тиймээс энэ мэргэжлийн хөтөлбөрийг нэмж, эмнэлэг хүртэлх тусламж үзүүлэгчдийг бэлтгэх сургагч багш нарыг бэлтгэх нь гол зорилго юм.” хэмээн Монголын яаралтай тусламжийн нийгэмлэгийн тэргүүн С.Алтансүх хэллээ.
Оролцогч эмч нар сургалтын эхний хоёр өдрийн туршид эмнэл зүйн өмнөх сэтгэлгээний ур чадвар, түргэн тусламжийн шийдвэрийг хурдан гаргаж хэрэгжүүлэхэд суралцаж үүний дараагаар сурсан мэдлэгээ бататгаж бусдад зааж, харилцан суралцах замаар сургалт амжилттай болж өндөрлөлөө.
