АНУ-ын холбооны засгийн газрын нийт өр анхны удаа 34 их наяд ам.доллар давсан гэдгийг тус улсын Сангийн яам мягмар гарагт /2023.01.02/ мэдээлсэн байна.
Тус улсын холбооны засгийн газрын төсвийн орлого буурч, зарлага өссөнөөс үүдэлтэй төсвийн алдагдал нэмэгдсээр байгаа юм. Төсвийн алдагдал нэмэгдсээр АНУ-ын нийт өр есдүгээр сард 33 их наяд ам.доллар давсан. Өөрөөр хэлбэл дөрөв гаруй сарын дотор АНУ-ын өр нэг их наяд ам.доллароор нэмэгдсэн гэсэн үг. 34 их наяд ам.доллар нь 11,594,000,000,000,000 төгрөг юм.
Конгресс арван хоёрдугаар сард засгийн газрын үйл ажиллагаа зогсохоос сэргийлсэн түр хугацааны төсөв баталсан. Одоо нэгдүгээр сарын 19 болон хоёрдугаар сарын 2-ноос өмнө Конгресс дахиж төсөв батлах шаардлагатай.
АНУ-ын хууль тогтоогчид 2024 оны төсвийг бүхэлд нь тогтоох тохиролцоонд хүрж чадахгүй гацжээ. Учир нь Конгресс дахь Бүгд найрамдах намын гишүүд 2024 оны төсвийг танахыг шаардаж байгаа. Төсвөөс гадна Конгресс Украин болон Израил руу илгээх мөнгөн тусламж дээр санал зөрөлдсөн. Үүний улмаас Украин руу илгээх тусламж царцсан байдалтай байгаа юм.
Эх сурвалж: Reuters
