Өчигдөр Ливаны өмнөд нутагт Хезболла зэвсэгт байгууллагын командлагчдын нэг алагдсан нь Израилийн талаас явуулсан ажиллагаатай холбоотой гэж сэжиглэж байна.
Алагдсан Виссам Тавил нь Хезболла зэвсэгт байгууллагын Радван Элит хүчний командлагчдын нэг байжээ.
Ираны дэмжлэгтэй Хезболла бол Израилийн хойд хөрш Ливан улсад үйл ажиллагаа явуулдаг зэвсэгт байгууллага юм.
Палестины Хамасын холбоотон тус байгууллага Газын зурваст дайн эхэлснээс хойш хилийн цаанаас Израилийн талтай бараг өдөр бүр буудалцаж байгаа.
Даваа гарагийн өглөө Тавилын зорчиж явсан автомашин агаарын цохилтод өртсөн байна. Түүнтэй хамт Хезболлагийн бас нэг гишүүн алагдсан тухай Ливаны төв хэвлэл мэдээлжээ.
Эх сурвалжуудын мэдээлснээр Тавил нь Ливаны өмнөд нутагт Израилийн эсрэг явуулж буй байлдааны ажиллагааны гол удирдагч байсан гэнэ.
Израилийн батлан хамгаалах яам Тавилын аллагатай холбоотой ямар нэг тайлбар өгөхөөс татгалзсан ч өчигдөр Ливаны нутаг дэвсгэр дэх Хезболла бүлгийн байрлалуудад агаарын цохилт өгснөө хүлээсэн байна.
Өнгөрсөн долоо хоногт Хамасын дэд удирдагч Салех аль-Арури мөн Ливаны нийслэл Бейрут хотын өмнөд дүүрэгт зургаан хүний хамт алагдсан юм. Үүнийг бас Израилийн явуулсан ажиллагаа гэж үзэж байгаа.
Гэхдээ эдгээр аллагууд нь Хезолла бүлэг Израилийн эсрэг дайны шинэ фронт нээхэд хүргэхгүй гэж ажиглагчид үзэж байна.
Ливаны иргэд 2006 онд Хезболла-Израилийн хооронд нэг сарын хугацаанд үргэлжилсэн дайн ямар их хор уршиг учруулж, эдийн засгийг сүйрүүлсэн нь одоо ч үргэлжилж буйг сайн мэддэг.
Тиймээс Хезболлагийн дайн Ливаны олон нийтийн дэмжлэгийг авах магадлал бага юм.
Гэхдээ үр дагаврыг буруу тооцоолсон шийдвэр гаргах магадлал өндөр хэвээр байна.
Өчигдөр хойд хилд байрлаж буй цэргүүдтэйгээ уулзсан Израилийн ерөнхий сайд Бенжамин Нетаньяху “Хезболла 2006 онд том алдаа гаргасан, одоо ч гаргасаар байна. Тэд биднийг аалзны тор шиг гэж бодсон. Гэхдээ ямар хэмжээний аалз болохыг төсөөлөөгүй. Энэ бол манай ард түмний асар их хүч, эв нэгдмэл, шийдэмгий байдал юм. Мэдээж бид хойд хилээ өргөн хүрээний кампанит ажиллагаа явуулахгүйгээр батлан хамгаалахыг илүүд үзэж байгаа. Гэхдээ энэ нь биднийг хязгаарлахгүй” гэж ярьжээ.
Эх сурвалж: BBC
