УИХ-ын чуулганаар ЭТТ компанийн 34 хувийг иргэдэд эзэмшүүлэх, ногдол ашиг тараах асуудлыг хэлэлцэх үеэр Б.Баттөмөр гишүүн ядуурлын тайлангийн талаар дурдав.
Тэрбээр “Эрдэнэс Тавантолгой компанийн 34%-ийг иргэдэд эзэмшүүлэх асуудлыг дэмжиж байгаа. 2022 оны арванхоёрдугаар сард УИХ-ын таван гишүүн энэ талаар хуулийн төсөл санаачлаад өргөн барьж байсан. Үүнийг хамтатгаад хэлэлцэх нь зүйтэй.
Дэлхийн банкнаас саяхан гаргасан судалгаанд Монголын 904,000 хүн ядуу, эдийн засгийн эрх чөлөөгүй байгааг дурдсан байсан. Энэ даруухан гаргасан тоо, нэг сая орчим ядуу иргэн байгаа. Ядуурах магадлалтай 400 мянга орчим хүн байгаа гэхээр 3.5 сая хүний 1.4 сая нь ядуу байна.
Иргэд ядуурсан нь хоёр шалтгаантай. Нэгдүгээрт төр засгийн алдаатай бодлоготой холбоотой. 1990 он хүртэлх монголын ард түмний бүтээсэн баялгийг хүн амын 20 хувь нь эзэмшиж, үлдсэн 80 хувь гудамжинд гарснаас ажилгүйдэл, ядуурал үүссэн. Дээрээс нь байгалийн баялгийн менежментийг цөөн хэдэн хүн авч, ард түмэн ядуурах болсон.
Уул уурхайн салбар ажлын байрны тавхан хувийг бүрдүүлдэг. Эдийн засагт том үүрэг гүйцэтгэдэг хэрнээ ажлын байрыг бага бий болгодог.
Хоёрдугаарт зах зээлийн нийгэмд хүнээ бэлдээгүй зэрэг төр засгийн алдаатай бодлогоос болж, иргэд ядуурсан гэдгийг хэлж байна.
ЭТТ компанийн 34 хувийг иргэдэд эзэмшүүлэх асуудал Баялгийн сангийн хуультай нягт уялдаж явах ёстой. Ирээдүйн өв сантай холбоотой алдааг давтаж болохгүй” гэлээ.
Ингээд чуулганаар ЭТТ компанийн 34 хувийг иргэдэд эзэмшүүлэх тогтоолын төслийг хэлэлцэх нь зүйтэй гэж дийлэнх гишүүд дэмжсэн учир анхны хэлэлцүүлэгт бэлтгүүлэхээр Байнгын хороонд шилжүүллээ.
