Украины тагнуулын алба Крымын хойгт байрласан ОХУ-ын байлдааны хөлөг онгоцонд пүрэв гарагийн /2024.02.01/ шөнө цохилт өгч, живүүлсэн гэж мэдэгджээ. ОХУ-ын Ивановец удирдлагатай пуужин харвагч хөлөг Крымын хойгийн хамгийн гүн нуур болох Донузлавт байхдаа хэд хэдэн удаа цохилтод өртөж, шөнө нь живсэн аж.
Одоогийн байдлаар ОХУ-ын Батлан хамгаалах яам, Кремль болон албан тушаалтнууд нь энэ үйл явдал дээр мэдэгдэл гаргаагүй байна. Сүүлийн үед Украины арми Крымын хойгт агаарын цохилт өгч, ОХУ-ын тэнгисийн цэргийн хөлгүүд рүү халдах болсон.
Эдгээр цохилт нь Крымын хойгийг Оросын зэвсэгт хүчнээс тусгаарлан, цэргийн үйл ажиллагаа явуулахад хүндрэлтэй болгох зорилготой гэж Украин мэдээлсэн юм.
Дайн эхэлснээс хойш ОХУ-ын тэнгисийн цэргийн амссан хамгийн том хохирол бол Хар тэнгисийн флотын хамгийн том байлдааны онгоц болох Москва живсэн явдал билээ.
![](https://eguur.mn/wp-content/uploads/2024/02/image_2024-02-02_124718013-1024x680.png)
Киевийн мэдээлснээр Украины арми 2022 оны дөрөвдүгээр сард Москва хөлөгт цохилт өгсөн. Цохилт өгснөөс хоёр өдрийн дараа Москва живсэн юм.
Эх сурвалж: CNN