“УБДС” ТӨХК нь 2023 оны техник эдийн засгийн зорилтот түвшний үзүүлэлтүүдээ бүрэн ханган биелүүлж, 2023-2024 оны халаалтын улирлын өвөлжилтийн бэлтгэл хангах төлөвлөсөн ажлуудыг амжилттай хийж гүйцэтгэн, хөдөлмөрийн аюулгүй ажиллагааны осол, осол дөхсөн тохиолдолгүй нийслэл хотын төвлөрсөн дулаан хангамжид холбогдсон хэрэглэгчдийг дулааны эрчим хүчээр найдвартай, тасралтгүй хангах үүргээ биелүүлж ажилласан тул Эрчим хүчний яамны хурлын шийдвэрийн дагуу “Улаанбаатар дулааны сүлжээ” ТӨХК 2023 оны Эрчим хүчний салбарын “Шилдэг компани” боллоо.
Тус компани нь саяхан Олон улсын чанарын менежментийн ISO 9001:2016 стандартыг үйл ажиллагаандаа нэвтрүүлсэн бөгөөд өөрийн эзэмшлийн 370 км урттай дулааны төв шугам, даралт өргөх 10-н насос станц, 3-н дулаан дамжуулах төвийн үндсэн тоноглолын ашиглалт, үйлчилгээг хариуцан ажиллаж нийслэл хотын төвлөрсөн дулаанд холбогдсон аж ахуйн гэрээтэй 3000 гаруй хэрэглэгч, ОСНААУГ-ны харьяа Хэрэглэгчдэд үйлчлэх 16 төв, хувийн тусгай зөвшөөрөл эзэмшигч 67 хэрэглэгчийн нийт 13400 гаруй барилга байгууламжийн халаалт, салхилуулга, хэрэгцээний халуун усны 3373.6 Гкал/ц-ийн ачаалал бүхий дулааны эрчим хүчний хэрэглээг жилийн турш тасралтгүй, найдвартай хангаж ажилладаг.
2023 онд гүйцэтгэлээр 7,688,293 Гкал дулааны эрчим хүчийг хэрэглэгчдэд түгээж 149,0 тэрбум төгрөгийн борлуулалтын орлогыг цуглуулж төлөвлөгөөг 100.2 хувиар биелүүлэн техник эдийн засгийн зорилтот түвшний үзүүлэлтүүдээ бүрэн хангаж ажилласан юм.
Өвөлжилтийн бэлтгэл ажлыг хангах чиглэлээр 2023 онд Их засвар, хөрөнгө оруулалт, Техник зохион байгуулалтын арга хэмжээ буюу дулааны шугамын засвар, насос станцууд, цахилгаан тоноглолын засварын төлөвлөгөөт 36 багц ажлуудыг 100% -ийн гүйцэтгэлтэй бүрэн хийж нийт 15 байршилд насжилтын хугацаа дуусаж ашиглалтын байдал нь муудаж, удаа дараа гэмтэл саатал гарч хэрэглэгчдийн дулаан хангамж доголдож байсан 2ф400-1000мм голчтой 14,8 км урттай дулааны шугам, тоноглолын өргөтгөл, шинэчлэлтийн ажлуудыг хийж гүйцэтгэсэн нь нийслэл хотын төвлөрсөн дулаан хангамжийн найдвартай ажиллагааг дээшлүүлсэн сүүлийн жилүүдэд хийгдээгүй томоохон бүтээн байгуулалтын ажил болсон байна.
Тухайлбал 2023 онд Дэлхийн Банкны санхүүжилтээр 5а (Багц5), 4а,б, 9а,б,ж 12г магистраль 5.5 хос.км шугам, Европын Сэргээн Босголт Хөгжлийн Банкны санхүүжилтээр Бичил 6 дугаар хороолол орчмыг газруудыг төвлөрсөн дулаанд холбох 2ф400мм голчтой 0.4 хос.км шугам, компани өөрийн хөрөнгө оруулалтаар 5 байршилд ф500-1000мм голчтой 0,73 хос.км шугам, улсын төсвийн хөрөнгө оруулалтаар 1-р хорооллын арын 2ф700мм голчтой 3,3 хос км шугамыг шинээр угсрах ажлыг дуусган ажиллагаанд залган өвөлжилтийн бэлтгэл ажлуудыг бүрэн хийж гүйцэтгэсэн.
Өнөөдрийн байдлаар төвлөрсөн дулаан хангамжид холбогдсон хэрэглэгчдийн тооцоот ачааллын хувьд эх үүсвэрийн суурилагдсан хүчин чадлаас (2318 Гкал/ц) 45 орчим хувиар хэтэрч чадлын дутагдалтай нөхцөлд ажиллаж байгаа хэдий ч “УБДС” ТӨХК-ийн хамт олон горим тооцооны дагуу хотын сүлжээг оновчтой схемийн хувилбараар ажиллуулан тохируулга, зүгшрүүлгийн ажлуудыг чанартай хийж гүйцэтгэн ажлын ур чадвар, хичээл зүтгэлтэй ажилласны үр дүнд 2023-2024 оны халаалтын улиралд нийт төвлөрсөн дулаан хангамжид холбогдсон хэрэглэгчдийг дулааны эрчим хүчээр хэвийн тасралтгүй, найдвартай ханган ажиллаж байна.
Өнгөрсөн 3-н жилийн хугацаанд:
- Улс, нийслэлийн хөрөнгө оруулалтаар нийт 2 байршилд Ф500-700мм голчтой 8 км урттай шугамыг 19,4 тэрбум төгрөгөөр
- ДБ, ЕСБХБ-ний санхүүжилтээр нийт 17 байршилд Ф400-1000мм голчтой 24,7 км урттай шугамыг 84,4 тэрбум төгрөгөөр
Тус тус хийж гүйцэтгэсэн нь нийслэлийн хэрэглэгчдийн дулаан хангамжийг сайжруулах, агаарын бохирдлыг бууруулах, гэр хорооллын дахин төлөвлөлтийн өсөн нэмэгдэх хэрэглээг хангах, төвлөрсөн дулаан хангамжийн найдвартай ажиллагааг дээшлүүлэх чиглэлээр хийгдсэн чухал үр дүнтэй бүтээн байгуулалтын ажил болсон байна.
