Хөгжлийн банкны гүйцэтгэх захирал Н.Мандуул үүрэгт ажлаасаа чөлөөлөгдөх хүсэлтээ өгчээ.
Тэрээр энэ тухайгаа “Би ажлаас чөлөөлөгдөх өргөдлөө хувийн шалтгаанаар энэ оны нэгдүгээр сарын 13, мөн энэ сарын 4-нд өгсөн. Намайг анх КОВИД-ын хуулиар түр томилсон. Банкны гүйцэтгэх захирлын албан тушаалд сонгон шалгаруулалт зарлах учиртай. Одоогоор улс төрд орох бодол байхгүй байна” хэмээн жиргэжээ.
Хөгжлийн банкны Төлөөлөн удирдах зөвлөлийн хуралдаанаар гүйцэтгэх захирал Н.Мөнхсүхийг өөрийн хүсэлтээр чөлөөлж, 2021 оны наймдугаар сарын 4-нд Н.Мандуулыг томилсон байдаг.
Н.Мандуул 2007 онд Сангийн яамны Төсвийн бодлогын газрын мэргэжилтнээс ажлын гараагаа эхлүүлж, Төсвийн бодлогын газар, Санхүүгийн бодлогын газарт хэлтэс, газрын дарга хүртэл нийт 10 гаруй жил Сангийн яаманд ажиллажээ.
Сангийн яаманд ажиллах хугацаандаа Засгийн газрын Мазаалай, Хуралдай, Дим сам, Гэрэгэ болон “Century” зэрэг бондуудыг олон улсын зах зээлд арилжаалах ажлыг удирдсан байна. мөн санхүүгийн зах зээлийн дунд хугацааны бодлого, санхүү, төсөв болон хөрөнгийн зах зээлийн томоохон хуулиудыг батлуулахад гол үүрэг гүйцэтгэсэн байна.
Тэрээр хамгийн сүүлд “Century” төслийн хүрээнд Чингис, Гэрэгэ бондуудын эргэн төлөлтийн хугацааг сунгах, хүүг бууруулах чиглэлээр гадаадын хөрөнгө оруулагч банкуудтай хийх хэлэлцээрийг удирдан ажиллажээ.
Хөгжлийн банкны чанаргүй зээлдэгчдийн шүүх хурал Улаанбаатар чуулгад ширүүхэн өрнөж буй. Шүүх хурал эхэлсний дараа Н.Мандуул чөлөөлөгдөх өргөдлөө өгсөн байна.
