Нийслэлийн төв хэсэгт орших Чойжин ламын сүм музейн газрын асуудал, тохижилттой холбоотой хар бараан мэдээллүүд хэдэн өдөр цахим орчинд иргэдийг бухимдуулж байв. Энэ асуудалтай холбогдуулан Чойжин ламын сүм музейн захирал Д.Отгонсүрэн хэвлэлийнхэнд дараах мэдээллийг өгсөн юм.
Тэрээр музейн газрын талаар болон сан хөмрөгийн шинэ байртай болох талаар, төсөвгүйгээс болж ажил хийж чадахгүй байгаагаа тайлбарлав.
Чойжин ламын сүм музейн захирал Д.Отгонсүрэн “Манай ажилчид хөхөө өвлийн хүйтэнд өвчилж байна, өөрсдөө бор зүрхээрээ музейгээ тордож арчилж ажилладаг. Манайх 20 ажилтантай. Ажилчид маань сарын 580 мянган төгрөгийн цалинтай. Төсөв ч үгүй, цэцэрлэг ч үгүй. Манай ажилчид хүйтэнд зогсоод гадаа зүлэг ногоог зулгааж, үзэгчдэдээ таатай орчин бүрдүүлэх гэж сэтгэл зүрхээрээ ажиллаж байна.
Та нар 580 мянган төгрөгийн цалин аваад энэ нийгэмд ажиллах уу?. Өнөөдөр манайд ажиллах хүн алга. Эхэндээ шалгалт авдаг байсан бол одоо цалин сонсоод ирэхгүй байна. Ажиллах хүнгүйгээс болж сүмээ нээж чадахгүй байна. Хүний нөөцийн хүнд байдалд орсон нь энэ. Үнэн ерөөсөө л энэ” гэв.
