УИХ-ын намрын чуулганы нэгдсэн хуралдаан Төрийн ордонд өнөөдөр болж байна.
Энэ үеэр “Хөрөнгө оруулалтын тухай хуулийн шинэчилсэн найруулгын төсөл”-ийг хэлэлцэж байгаа юм.
Тус хуулийн төсөлтэй холбогдуулан УИХ-ын гишүүн Б.Баттөмөр, Эдийн засгийн хөгжлийн сайд Ч.Хүрэлбаатар дараах байр суурийг илэрхийлж, хариулт өгөв.
УИХ-ын гишүүн Б.Баттөмөр: Бид бусдын муу муухайг гайхаад байх хэрэггүй. Улс орнууд өөрсдийнхөө жамаар хөгжиж байгаа.
Сүүлийн 30 жилийн хугацаанд ханшийн уналт, инфляц, өвчлөл, утаа, түгжрэл, гадаад өр гэх мэтчилэн тоочвол зарим талаараа тэднээс дор орсон ч байж магад.
Өөрсдийнхөө гэрийг гэрэлтүүлчхээд хүний гэрийг гэрэлтүүл гэж үг бий. Ийм учраас бодолтой ярихгүй бол болохгүй.
Энэ жил Монгол Улсын төсөвт 760 тэрбум төгрөг нийлүүлнэ. Манай улсын нийт төсөв 27 их наяд төгрөг.
2023 онд болсон эдийн засгийн форумын үеэр “Рио Тинто”-гийн ТУЗ-ийн дарга “Оюутолгой төслийн үр ашиг монголчуудын хүссэн хүсэл, хүлээлтэд хүрээгүй” гэдгээ хүлээн зөвшөөрч байсан.
Нэг буруу хийсэн гэрээ цаашид жишиг болоод явчихдаг. Ийм учраас гадаадын хөрөнгө оруулалтыг татахдаа Монгол Улсын ард иргэдийн эрх ашгийг нэгдүгээрт тавьж, үр ашигтай хийх нь зүйтэй.
Казахстанаас эхлээд олон оронд ийм жишиг байна. Гэвч Монголд алга.
Яагаад гадаадын хөрөнгө оруулалт манайхаас дайжив, яагаад 5,500 ААН Монголоос татан буугдав, Яагаад нийт ААН-ийн 3.7-хон хувь нь гаднын хөрөнгө оруулалттай байна вэ. Энэ бүхэн хуульдаа байна уу, эсвэл өөр шалтгаан бий юу?
Сайд Ч.Хүрэлбаатар: Яагаад гадаадын хөрөнгө оруулалттай ААН-үүдийн тоо цөөрч байгааг нэлээд сайн судалж үзсэн.
Бүртгэл, зөвшөөрөл авах, шүүхэд хандах, шүүх дээр очиж асуудлаа шийдвэрлүүлэх зэрэг олон асуудал гардаг.
Хөрөнгө оруулагчдын гомдлыг Засгийн газар дээр ярьдаг болж эхэлсэн. Анх эхлээд найман гомдол ирсэн. Одоо 69 ААН гомдол гаргасан байгаа.
Манай зарим хуулийн байгууллагын хүмүүс нийлж байгаад хүний бизнесийг булаадаг, хуулиар шаардах ёсгүй зүйлсийг нэхдэг, шаарддаг. Зарим лицензийг нь хүчингүй болгуулж өөрсдөө авдаг.
Гэрийнх нь энд тэнд хар тамхи аваачиж нуучхаад илрүүлээд хөөж гаргадаг. Хөрөнгийг нь дээрэмддэг үзэгдэл гараад байгаа учраас Монгол Улсад гадаадын хөрөнгө оруулалт орж ирэхгүй байгаа юм.
Энэ бүхнийг засах зорилгоор Хөрөнгө оруулалтын тухай хуулийг оруулж ирсэн.
