Улсын Онцгой Комиссоос хаваржилтын нөхцөл байдлын талаар өнөөдөр мэдээлэл хийлээ.
Монгол Улсад өнөөдрийн байдлаар 3,080,000 мал зүй бусаар хорогдов. Нийт хонин сүргийн 5.1, ямаан сүргийн 4.6, үхэр сүргийн 5.4, адуун сүргийнхээ 5.3, тэмээн сүргийнхээ 0.3 хувийг тус бүр алдаад байна.
ХХААХҮ-ийн дэд сайд М.Ганхүлэг хэлэхдээ “Уур амьсгалын өөрчлөлтийн давтамж нь их өндөр болж байгаа. Тэр утгаараа мал аж ахуйн салбарын асуудлыг цогцоор харах шаардлага бий. Хүнсний хувьсгалын хүрээнд дотооддоо мах, төмс, гурилыг 100 хувь хангаж буй билээ. Мал, махыг худалдан аваад БНХАУ руу экспортолдог байсан бол булангийн орнууд руу экспортлох боломж бүрдэж эхэлсэн.
Тэр утгаараа цаг үеийн хариу арга хэмжээ авахаас илүүтэй урьдчилан сэргийлэх буюу мал, мах болон түүхий эдийн бүтээгдэхүүний үнийг нэмэгдүүлэх, бусад боловсруулах үйлдвэрүүдийг барих ажил руу орох шаардлага бий.
Түүнчлэн арьс ширтэй холбогдолтой томоохон дөрвөн төсөл дээр ХХААХҮЯ ажиллаж байна. Үүнд
- Дархан арьс ширний цогцолборын хувьд 180 га талбайд хувийн хэвшлийн хөрөнгө оруулалтаар дэд бүтэц нь хийгдээд, шүүхийн маргаантай асуудлаас болоод ажил нь түр зогсчихсон. Дэд бүтцийг нь үнэлээд төр худалдаж авахаа илэрхийлчихсэн. Хувийн хэвшил хариу үзүүлэхдээ удаашралтай нөхцөл байдалд байна.
- Ховдод 17-18 үйлдвэрийн зохион байгуулалттай аж үйлдвэрийн парк байгуулагдана.
- Дорнодод Халх голын аж үйлдвэрийн паркийн төсөл бий. ТЭЗҮ нь батлагдах гэж байгаа.
- Улаанбаатар хотоос арьс ширний үйлдвэрүүдийг нүүлгэхэд чиглэсэн Эмээлтийн аж үйлдвэрийн парк бий. Дэлхийн Банкны санхүүжилтээр энэ оны гуравдугаар сард ТЭЗҮ нь эцэслэгдэн батлагдана” хэмээв.
Үргэлжлүүлэн “Бэлчээрийн тухай хуулийн төслүүд яригдаж байгаа ч Хаврын чуулганд орох эсэх талаарх мэдээлэл одоогоор байхгүй.
“МАЛЖУУЛАХ ХӨТӨЛБӨР ЗОХИОН БАЙГУУЛАХ ЧИГЛЭЛЭЭР АЖИЛЛАНА”
Харин богино хугацааны арга хэмжээг төсөл хэлбэрээр бэлдэж байгаа. Тодруулбал их хэмжээний малаа зүй бус хорогдлоор алдаж байгаа малчид гарч ирж байгаа тул ХНХЯ бусад яамдтай хамтран малжуулах хөтөлбөр зохион байгуулах чиглэлээр ажиллаж байна.
Мөн малчдын бүлэг байгуулж, аравтын системийн зохион байгуулалтад оруулж тэжээл тариалах ажлыг энэ хавар зохион байгуулна. Үүнд шаардлагатай өрийн болон аргазүйн дэмжлэгийг ХХААХҮЯ-наас үзүүлэх юм” хэмээн ярилаа.
