УИХ-ын Төсвийн байнгын хорооноос өнөөдөр /2024.01.22/ УИХ-ын намрын чуулганы хугацаанд хийж гүйцэтгэсэн ажлынхаа тайланг тавилаа.
УИХ-ын Төсвийн байнгын хороо нь намрын чуулганы хугацаанд нийтдээ 18 удаа хуралдаж, 29 хууль, 16 тогтоолын төслийг батлуулсан байна. Мөн Төрийн аудитын байгууллагаас ирүүлсэн таван тайланг хэлэлцэж, шийдвэрлэжээ.
УИХ-д НӨАТ болоод Орлогын албан татвартай холбоотойгоор 100 мянган иргэний санал ирсэн байдаг. Энэ асуудлыг Төсвийн байнгын хороо судлахад иргэн, аж ахуйн нэгж дээр ирж буй бизнесийн дарамтыг бууруулах зайлшгүй шаардлага байгаа аж. Тиймээс татварын эрх зүйн орчныг шинэчлэхээр УИХ болон Төсвийн байнгын хорооноос ажлын хэсэг байгуулагдан ажиллаж буй аж.
УИХ-ын Төсвийн байнгын хорооны дарга Г.ТЭМҮҮЛЭН:
-Аж ахуй нэгж, иргэдэд ирж байгаа хүндрэл бэрхшээллийг судлахад санхүүгийн ачааллыг бууруулах зайлшгүй шаардлага үүссэн байгаа. Цаашдаа гурван үе шаттай татварын реформ шинэчлэл хийхээр төлөвлөж байна. Эхний үе шат болгож, УИХ-аас дүрэм журам, стандарт хангуулах хүрээнд ард иргэд, аж ахуй нэгжээс авч байгаа үйлчилгээний төлбөр хөлс нэртэй хураамжийг цэгцлэх шаардлагатай гэж үзсэн. Энэ хүрээнд Төсвийн байнгын хороо нь тогтоол боловсруулж, УИХ намрын чуулганы сүүлийн хуралдаанаар батлуулсан. Уг тогтоолоор эхний гурван сард багтаан төрийн байгууллагуудад мөрдөгдөж байгаа Хууль зүйн яамаар батлагдсан 2700 гаруй дүрэм журам, стандартыг цэгцэлж, зохицуулалт, үйлчилгээ нэрийн дор аж ахуй нэгжүүдээс авч байгаа хөлс хураамж, төлбөр зэргийг хүчингүй болгохыг Засгийн газарт чиглэл болгосон.
Улсын хэмжээнд нийт 2700 гаруй дүрэм журам өөрчлөгдөнө. Өнгөрсөн таван жилийн хугацаанд дүрэм, журам хоёр дахин нэмэгдсэнээр иргэн, аж ахуй нэгжүүдэд бизнесийн дарамт шахалт ч нэмэгдсэн байгаа.
Хоёрдугаарт, гуравдугаар сарын 15-нд Монголын төрөөс ирэх 10-15 жилийн хугацаанд татварын талаар баримтлах бодлогын баримт бичгийг УИХ-д өргөн барьж, батлуулахаар төлөвлөж байна. Ард иргэдээс гаргасан татварын ачааллыг бууруулах бодлогын баримт бичиг өргөн мэдүүлэх юм.
УИХ-аас анх удаагаа томилогдож, байнгын орон тооны бүтэцтэйгээр ажиллаж эхэлж байгаа Төсвийн тогтвортой байдлын зөвлөл өнөөдрөөс үйл ажиллагаа нь албан ёсоор эхэлж байна. УИХ Монголын төсөв санхүү дээр учирсан 10-15 жилийн алдааг засч залруулах, цаашдаа төсвийн шинэчлэлийг хийх хүрээнд 14 хуулиудыг батлуулсан. Энэ дагуу төрийн нийтийн санхүүгийн зохистой удирдлага хэрэгжүүлэх, хариуцлагатай байдал бий болгох зайлшгүй шаардлагатай учраас мэргэжлийн төсөв санхүүгийн хяналтын зөвлөл байгуулахаар шийдвэрлэсэн. Төсвийн тогтвортой байдлын зөвлөлийн үндсэн эрх үүрэг нь жил бүрийн УИХ- аар орж ирж батлагддаг Төсвийн хүрээний мэдэгдэл, Монгол Улсын төсвийн хуулийн төслийг хэлэлцэх үед шаардлагатай мрэгэжлийн дүгнэлт гаргах, улс төрөөс болоод төрөөс хараат бус бие даасан байдлаар дүгнэлт гаргах байгууллага бий болсон.
Төсвийн тогтвортой байдлын зөвлөл нь Төсвийн хүрээний мэдэгдэл, төсвийн таамаглалыг нотолгоон дээр суурилж гаргаж ирнэ гэлээ.
