Нийслэлийн хүүхэд залуусыг спортоор хичээллэх, чөлөөт цагаа зөв боловсон өнгөрүүлэх боломжийг бүрдүүлэх зорилгоор НЗДТГ, Монголын 3×3 сагсан бөмбөгийн холбоо хамтран “Улаанбаатар кап” 3×3 сагсан бөмбөгийн тэмцээнийг энэ сарын 22-ноос зохион байгуулах гэж байгаа билээ.
Энэ талаарх зарим мэдээллийг Монголын сагсан бөмбөгийн холбооны ерөнхий нарийн бичгийн дарга С.Төгсжаргалаас тодруулсан юм. Тэрээр “НЗДТГ, Монголын 3×3 сагсан бөмбөгийн холбоотой хамтран өнгөрсөн жилээс эхлэн уг тэмцээнийг зохион байгуулж байна.
Энэ жилийн “Улаанбаатар кап”-ын хүрээнд нийслэлийн 9 дүүргийн аварга шалгаруулах тэмцээн дөрөвдүгээр сарын 22-ноос эхлэн амралтын өдрүүдээр Д.Сүхбаатарын талбайд болно.
Аваргуудын аварга буюу финалын тэмцээнийг тавдугаар сарын 21-нд зохион байгуулах юм. Энэ тэмцээнд ялсан баг долоодугаар сард болох Макаод болох “ФИБА 3×3 Макао” дэлхийн их дуулгын тэмцээнд оролцох эрх авна. Энэ талаарх мэдээллийг бид Монголын 3×3 сагсан бөмбөгийн холбооны сошиал хуудсуудаар өгч байгаа бөгөөд багуудын бүртгэлийг тэмцээн болохын өмнөх өдөр зохион байгуулна.
Ангиллын хувьд нас хүрэгчдийн эрэгтэй, эмэгтэй гэсэн ангиллаар зохион байгуулах тул 16-аас дээш насны хэн бүхэн оролцоход нээлттэй. Спортын энэ төрлөөр манай тамирчид өндөр амжилт гаргасаар байна” гэсэн юм.
