Өмнөд Солонгосын алдарт дуучин IU энэ сарын 20-нд “The Winning” нэртэй шинэ цомгоо гаргана. Тэрбээр тус цомог дээрх бүх дуунуудын үгийг өөрөө бичсэн гэж “Edam Entertainment” мэдээлжээ.
“The Winning” цомогт “Shopper”, “Spore”, “Shh”, “I Stan U” болон “Love Wins All” нэртэй таван дуу багтах юм. “Love Wins All” уран бүтээл нь өнгөрсөн сард урьдчилсан байдлаар цацагдсан.
Тус уран бүтээлийн бичлэг дээр IU “BTS” хамтлагийн V-тэй хамтран тоглосон нь К поп сонирхогчдын дунд шуугиан дэгдээсэн юм. “Love Wins All” дуу Youtube дээр өнөөдрийн байдлаар 40.8 сая хандалт авсан байна.
Саяхан дебютээ хийсэн ч гэсэн дэлхий даяар алдартай болсон “NewJeans” хамтлагийн Хеин, “Roller Coaster” хамтлагийн дуучин, дууны үг бичээч Чо Вон Сун “Shh” уран бүтээлд оролцжээ.
IU-гийн харьяалагддаг “Edam Entertainments” түүний шинэ цомгийн талаар мэдэгдэл гаргахдаа “IU энэ цомог дээр урт хугацааны турш ажиллан, маш их хүчин чармайлт гаргаж, дууны үгийг бичээд зогсохгүй продюсерын хувиар ажиллан нарийн ширийн бүх зүйлийг хянасан” гэсэн байна.
Эх сурвалж: Korea Times
